પંજાબના નાનકડા ગામની માતાએ મહેનત કરી દિકરાને ભણવા મોકલ્યો હતો
(સંપૂર્ણ સમાચાર સેવા)
કેનેડાના વિનિપેગમાં ભારતીય યુવકનો રહસ્યમયી સંજોગોમાં કારની અંદરથી મૃતદેહ મળી આવ્યો છે. મૃતકનું નામ સતપાલ સિંહ હતું અને તે ૨૪ વર્ષની ઉંમરનો હતો. પંજાબના નાના ગામથી તેની માતાએ મહેનત કરીને ભણવા માટે કેનેડા મોકલ્યો હતો. જોકે રહસ્યમયી સંજોગોમાં દીકરાના મોત બાદ પરિવારમાં શોકનો માહોલ પ્રસરી ગયો છે.
પરિવાર પાસે અત્યારે સતપાલના મૃતદેહને ભારત લાવવા માટેના પણ રૂપિયા નથી. જેથી તેમને ભારતીય સરકારની મદદ માંગી છે. તેમને પોતાના દીકરાના અંતિમ સંસ્કાર કરવાની ઈચ્છા વ્યક્ત કરી છે.
પ્રાપ્ત થતી વિગતો પ્રમાણે ૨૪ વર્ષીય સતપાલ સિંહ જ્યારે નાનો હતો ત્યારે જ પિતાનું અવસાન થઈ ગયું હતું. તેના પરિવારમાં એકલા માતા જ હતા. જેની સારસંભાળ રાખી એક સારા ભવિષ્ય બનાવવા માટે દીકરો કેનેડા ગયો હતો. કેનેડામાં તેને અભ્યાસ પૂરો કર્યા પછી કરિયર સેટ કર્યું હતું. સતપાલ સિંહ કેનેડામાં સારી એવી નોકરી પણ કરતો હતો. એના માતા અને મામાએ જણાવ્યું કે સતપાલ હંમેશાથી ભણવામાં પણ હોંશિયાર હતો. અઢી વર્ષ પહેલા તે કેનેડા ગયો હતો. તે વિનિપેગમાં રહેતો હતો અને ત્યાં જ પાર્ટ ટાઈમ નોકરી પણ કરતો હતો.
બાદમાં અચાનક એક રાત્રે કેનેડાથી સતપાલના મિત્રોએ જણાવ્યું કે તેમના દીકરાનું મોત નીપજ્યું છે. સતપાલનો મૃતદેહ કારમાંથી મળી આવ્યો હતો. અહીં હજુ સુધી વિનિપેગમાં પોલીસે એ જાણકારી નથી આપી કે મોત કેવી રીતે નીપજ્યું કે આની પાછળ કોનો હાથ હશે.
પરિવારને જ્યારે સતપાલના મોત અંગે જાણ થઈ તો શોકનો માહોલ ફેલાઈ ગયો હતો. તેના માતા આ વાત પચાવી જ નહોતા શક્યા કે એમનો યુવાન દીકરો હવે આ દુનિયામાં નથી રહ્યો. મૃતક સતપાલના માતાએ કહ્યું કે તેમને ગરીબીમા જીવન પસાર કર્યું હતું.
નાનપણથી જ દીકરાને કરકસર કરીને ભણાવ્યો અને તે હોશિયાર હતો એટલે સારા માર્ક્સ લાવી કરિયર સેટ કરવા માટે કેનેડા ગયો હતો. વિધવા માતાએ એજ્યુકેશન લોન લઈને દીકરાને કેનેડા ભણવા માટે મોકલ્યો હતો. તેમના દીકરાએ પણ પાર્ટ ટાઈમ નોકરી કરીને માતાને ઘણી મદદ પણ કરી હતી. તેના માતાએ કહ્યું કે સતપાલના દાદાનું પણ ગત વર્ષે નિધન થયું હતું. મારા પરિવારમાં હવે એક જ કોઈ સભ્ય હતો અને એ પણ મારો દીકરો ૨૪ વર્ષની નાની ઉંમરે મૃત્યુ પામ્યો છે. આ જાણીને મને ઘણો આઘાત લાગ્યો છે.
પરિવારના સભ્યોએ જણાવ્યું કે સતપાલના માતાની આર્થિક સ્થિતિ સારી નથી. તેઓ દીકરાના મૃતદેહને ભારત લાવવા માટેનો ખર્ચ ઉઠાવી શકવા સક્ષમ નથી. જેથી કરીને દીકરાની અંતિમ વિધિ કરી શકાય એના માટે તેમને ભારત સરકારની મદદ માગી છે કે તેઓ સતપાલના પાર્થિવ દેહને દેશમાં પરત લાવવા કામગીરી હાથ ધરે. તેના માતાએ દુઃખ સાથે જણાવ્યું કે આ મારી અંતિમ ઈચ્છા છે કે હું મારા દીકરા સતપાલને એક છેલ્લી વાર જોવા માંગુ છું.
