Last Updated on by Sampurna Samachar
આંગડિયા પેઢીના કર્મચારીઓને નિશાન બનાવતા સાગરિતો ઝડપાયા
કુલ ૧૦.૫ લાખનો મુદ્દામાલ જપ્ત કર્યો
(સંપૂર્ણ સમાચાર સેવા)
અમદાવાદમાં છેલ્લા કેટલાક સમયથી સક્રિય અને આંગડિયા પેઢીના કર્મચારીઓને નિશાન બનાવતી કુખ્યાત છારા ગેંગના બે સાગરીતોને પોલીસે ઝડપી પાડ્યા છે. ઉલ્લેખનીય છે કે, ગત ડિસેમ્બર મહિનામાં સરખેજ અને એલિસબ્રિજ વિસ્તારોમાં લૂંટની ઘટનાઓ બની હતી. જેની તપાસ દરમિયાન પોલીસને છારાનગરની ગેંગ સંડોવાયેલી હોવાના પુરાવા મળ્યા હતા.
બે દિવસ પહેલા આ ગેંગના સભ્યો સરખેજ વિસ્તારમાં ફરી રહ્યા હોવાની ચોક્કસ બાતમી મળતા પોલીસે વોચ ગોઠવી હતી. જેમાં પ્રતીક પાંડેકર અને સંકુલ નામના બે આરોપીઓની ધરપકડ કરવામાં આવી છે. આ બંને આરોપીઓ અગાઉ પણ સાત જેટલા ગુનાઓમાં પોલીસ ચોપડે ચડી ચૂક્યા છે.
ફરાર આરોપીઓને પકડવા માટે ચક્રો ગતિમાન
આ ગેંગના સભ્યો મુખ્યત્વે આંગડિયા પેઢીના વ્યવહારો પર નજર રાખતા અને ત્યારબાદ પોતાનો ‘ટાર્ગેટ‘ નક્કી કરતા હતા. તેમની મોડસ ઓપરેન્ડી પાર્ક કરેલી ગાડીઓના કાચ તોડીને તેમાંથી રોકડ ભરેલી બેગની ચોરી કરવાની હતી. સરખેજમાં પણ તેઓએ આ જ પદ્ધતિથી ગાડીનો કાચ તોડી ૧૦ લાખની મોટી રકમની લૂંટ ચલાવી હતી. ધરપકડ કરાયેલા આરોપીઓ પાસેથી પોલીસે અત્યાર સુધીમાં ૮ લાખની રોકડ અને ૨.૫ લાખની કિંમતની ચાંદી મળી કુલ ૧૦.૫ લાખનો મુદ્દામાલ જપ્ત કર્યો છે.
પોલીસની પ્રાથમિક પૂછપરછમાં આરોપીઓએ અમદાવાદના બોપલ, રામોલ અને સોલા સહિતના વિસ્તારોમાં આચરેલી ચોરીઓ અને અન્ય ૭ જેટલા ગુનાઓની કબૂલાત કરી છે. આ ટોળકીમાં કુલ ૪ થી ૫ સભ્યો સક્રિય હતા. જેમાંથી પ્રતીક અને સંકુલ પકડાયા છે, જ્યારે અન્ય સાગરીતો અજય, વિશાલ, રોશની અને શનિ હાલ ફરાર છે. પોલીસ આ ફરાર આરોપીઓને પકડવા માટે ચક્રો ગતિમાન કર્યા છે અને ગેંગ દ્વારા આચરવામાં આવેલા અન્ય ગુનાઓની દિશામાં પણ તપાસ હાથ ધરી છે.
