Last Updated on by Sampurna Samachar
AI ની દુનિયામાં ભારત-અમેરિકાની મોટી ડીલ
ઓસ્ટ્રેલિયા, ગ્રીસ, ઇઝરાયેલ, જાપાન જેવા દેશોનો સમાવેશ
(સંપૂર્ણ સમાચાર સેવા)
ભારતે AI સમિટ દરમિયાન અમેરિકાના નેતૃત્વ હેઠળના ‘Pax Silica’ એલાયન્સમાં જોડાવાની જાહેરાત કરી છે. નવી દિલ્હીમાં થયેલા આ કરાર સાથે જ ભારત સેમિકન્ડક્ટર અને આર્ટિફિશિયલ ઈન્ટેલિજન્સના વિશ્વના સૌથી મોટા ગઠબંધનનો હિસ્સો બની ગયું છે.
આ સંગઠનનો મુખ્ય હેતુ સેમિકન્ડક્ટર અને રેર અર્થ મટિરિયલ્સની સપ્લાય ચેઈનને કોઈપણ અવરોધ વગર ચાલુ રાખવાનો છે. ખાસ કરીને એવા દેશો પર ર્નિભરતા ઘટાડવાનો છે જે આ એલાયન્સનો હિસ્સો નથી. જોકે કરારમાં કોઈ દેશનું નામ લેવામાં આવ્યું નથી, પરંતુ સ્પષ્ટ છે કે આ ઈશારો ચીન તરફ છે. પાકિસ્તાન પણ આ ગ્રુપમાં સામેલ નથી.
ભારત-અમેરિકા વચ્ચેનો આ કરાર AI નો લાભ દરેક પહોંચશે
ભારત અને અમેરિકા ઉપરાંત આ એલાયન્સમાં ઓસ્ટ્રેલિયા, ગ્રીસ, ઇઝરાયેલ, જાપાન, કતાર, દક્ષિણ કોરિયા, સિંગાપોર, બ્રિટન અને સંયુક્ત આરબ અમીરાત જેવા દેશો સામેલ છે. આ દેશો સાથે મળીને ગ્લોબલ ટેક ઇકોસિસ્ટમ તૈયાર કરશે. પાંચ દિવસીય AI સમિટના છેલ્લા દિવસે આ સમજૂતી પર હસ્તાક્ષર કરવામાં આવ્યા હતા, જેમાં વિશ્વભરના ટેક લીડર્સ અને ૬૦૦ જેટલા સ્ટાર્ટઅપ્સ હાજર રહ્યા હતા.
કેન્દ્રીય મંત્રી અશ્વિની વૈષ્ણવે જણાવ્યું હતું કે, “દુનિયાને ભારત પર ભરોસો છે. આપણી પાસે મોટું ટેલેન્ટ પૂલ અને વિશ્વસનીય વિદેશ નીતિ છે. Pax Silica સંગઠન સેમિકન્ડક્ટર સપ્લાય ચેઈન, મેન્યુફેક્ચરિંગ અને ચિપ ડિઝાઇન માટે અત્યંત મહત્વનું છે.”
૧૦ પ્લાન્ટ તૈયાર: ભારતમાં ૧૦ સેમિકન્ડક્ટર પ્લાન્ટ તૈયાર થઈ ચૂક્યા છે અને ટૂંક સમયમાં ઉત્પાદન શરૂ થશે.
એડવાન્સ ટેકનોલોજી: હાલમાં ભારતમાં અત્યંત એડવાન્સ ‘નેનોમીટર ચિપ્સ‘ ડિઝાઇન કરવામાં આવી રહી છે.
ફ્રી સોસાયટી: અમેરિકન રાજદૂત સેર્જિયો ગોરે ભારતનું સ્વાગત કરતા કહ્યું કે આ કરાર મુક્ત સમાજ અને અવિરત સપ્લાય ચેઈન સુનિશ્ચિત કરશે.
ગૂગલના સીઈઓ સુંદર પિચાઈ પણ આ સમિટમાં હાજર હતા. તેમણે કહ્યું કે ભવિષ્યમાં AI ખૂબ જ મહત્વપૂર્ણ છે અને ભારત-અમેરિકા વચ્ચેનો આ કરાર AI નો લાભ દરેક સુધી પહોંચાડવામાં મદદરૂપ થશે. ગૂગલ આ બંને દેશો વચ્ચેના સંબંધોમાં સેતુ બનવા બદલ ગર્વ અનુભવે છે.
