Last Updated on by Sampurna Samachar
અમેરિકા પર ટેરિફ વધારી ૧૨૫ ટકા કરવાની જાહેરાત
ટ્રમ્પે ૭૦ થી વધુ દેશોને ટેરિફમાં ૯૦ દિવસની રાહત આપી
(સંપૂર્ણ સમાચાર સેવા)
અમેરિકા અને ચીન વચ્ચે ટ્રેડવૉર ચરમસીમાએ પહોંચી ગયું છે. અમેરિકા ચીન (CHIN) પર એક પછી એક ટેરિફ ઝીંકી રહ્યું છે, ત્યારે વળતો જવાબ આપતાં ચીન પણ અમેરિકા પર ટેરિફ લાદી રહ્યું છે. ટ્રમ્પે ચીન પર ૧૪૫ ટકા ટેરિફ લાદ્યાના ૨૪ કલાકમાં ચીને અમેરિકન પ્રોડક્ટ્સ પર ટેરિફ વધારીને ૧૨૫ ટકા કર્યો છે.
આ નવો ટેરિફ અમલમાં મૂકાઇ ગયો છે. ઉલ્લેખનીય છે કે ટ્રમ્પે અગાઉ નવ એપ્રિલના રોજ ચીનના સામા જવાબના કારણે ૧૪૫ ટકા ટેરિફ જ્યારે અન્ય ૭૦થી વધુ દેશોને ટેરિફમાં ૯૦ દિવસની રાહત આપવાનો ર્નિણય જાહેર કર્યો હતો. ટ્રમ્પના આ ર્નિણયથી ચીને ભયભીત થવાના બદલે વળતો પ્રહાર કરવાનું નક્કી કર્યું છે.
ઉલ્લેખનીય છે, ટ્રમ્પના ચીન પ્રત્યેના આકરા વલણ વચ્ચે અહેવાલો આવ્યા હતા કે, વિશ્વની બે મહાસત્તા ટ્રેડવૉર મુદ્દે વાટાઘાટો કરવા તૈયાર છે. એવામાં ચીનનું આ પગલું ટ્રેડવૉરની આગને ઓલવવાના બદલે વધુ હવા આપી શકે છે. બેઈજિંગના સ્ટેટ કાઉન્સિલ ટેરિફ કમિશને જણાવ્યું હતું કે, અમેરિકા દ્વારા ચીન પર અયોગ્ય ઊંચા ટેરિફ લાદવાની કવાયત આંતરરાષ્ટ્રીય વેપાર નિયમોનું ગંભીરપણે ઉલ્લંઘન કરે છે. જે સામાન્ય આર્થિક કાયદા પર પણ હુમલો કરે છે. ટેરિફના કારણે આયાતકારો માટે હવે અમેરિકાની પ્રોડક્ટ્સ લોકપ્રિય રહી નથી.
શી જિનપિંગે કરી માંગ
ચીનના રાષ્ટ્રપતિ શી જિનપિંગે “એકપક્ષીય ગુંડાગીરી”ને પ્રતિકાર આપવાં યુરોપિયન યુનિયનને બેઇજિંગ સાથે હાથ મિલાવવા અપીલ કરી હતી. આ અપીલના થોડા કલાકો બાદ તેમણે અમેરિકા પર ટેરિફ વધારી ૧૨૫ ટકા કર્યો હોવાની જાહેરાત કરી હતી. જિનપિંગે કહ્યું કે, ચીન અને યુરોપ આંતરરાષ્ટ્રીય જવાબદારીઓ નિભાવવા માટે સજ્જ છે અને સંયુક્તપણે એકપક્ષીય ગુંડાગીરીને આકરો પડકાર આપી શકે છે. આ જોડાણ આપણા અધિકારો અને હિતોની સુરક્ષા જ નહીં પણ આંતરરાષ્ટ્રીય પારદર્શિતા અને કાયદાની રક્ષા માટે છે.
અમેરિકાના પ્રમુખ ડોનાલ્ડ ટ્રમ્પે ૧૪૫ ટકા ટેરિફ લાદવાની જાહેરાત બાદ જણાવ્યું હતું કે, ‘તેઓ ચીન સાથે ડીલ કરવા તૈયાર છે, વિશ્વની ટોચની બે આર્થિક મહાસત્તા ધરાવતા દેશો ટ્રેડવૉર મુદ્દે યોગ્ય ઉકેલ લાવી શકે તેમ છે. અમે ચીન સાથે ડીલ કરવા તૈયાર છીએ. વાસ્તવમાં તેઓએ લાંબા સમય સુધી આપણા દેશનો ફાયદો ઉઠાવ્યો છે. તેઓએ અમને અન્ય કરતાં વધુ છેતર્યા છે.
