Last Updated on by Sampurna Samachar
અમેરિકામાં પેટ્રોલિયમ, માઈનિંગ અને એગ્રીકલ્ચર કોર્સનું આકર્ષણ વધ્યું
(સંપૂર્ણ સમાચાર સેવા)
વિદેશમાં અભ્યાસ કરવા માટે ભારતીય વિદ્યાર્થીઓનું અમેરિકા ફેવરિટ ડેસ્ટિનેશન થઇ ગયું છે. અમેરિકાની વર્લ્ડ ક્લાસ યુનિવર્સિટીઓમાં એડમિશન મેળવવા ભારતના જ નહીં પરંતુ વિશ્વના અન્ય દેશોના વિદ્યાર્થીઓ પણ આગળ પડતા હોય છે. તેનું કારણ એ છે કે, અહીં ભણવાની સાથે-સાથે નોકરીની પણ સારી તકો મળી રહે છે. જોકે, ડોનાલ્ડ ટ્રમ્પ બીજી વખત અમેરિકાના પ્રમુખ પદે ચૂંટાઈ આવ્યા પછી પરિસ્થિતિ ઘણી બદલાઈ ગઈ છે અને હાલના સંકેતો જોતા એવું લાગી રહ્યું છે કે, તેઓ સત્તા સંભાળશે પછી તો ઈમિગ્રન્ટ્સ માટે વધારે કપરી સ્થિતિ ઊભી થવાની છે અને અભ્યાસના બહાને અમેરિકા જઈને નોકરી કરતા વિદ્યાર્થીઓ માટે પણ મુશ્કેલી ઊભી થવાની છે.
આ બધાની વચ્ચે એક રસપ્રદ વાત એવી પણ સામે આવી છે કે, છેલ્લા કેટલાક સમયથી અમેરિકા અભ્યાસ માટે જતા ભારતીય વિદ્યાર્થીઓમાં પેટ્રોલિયમ,માઈનિંગ અને એગ્રીકલ્ચર રિલેટેડ કોર્સમાં એડમિશન લેવાનું પ્રમાણ વધ્યું છે. ટ્રમ્પ એડમિનિસ્ટ્રેશનની એનર્જી પોલિસીઝને તેની પાછળનું મુખ્ય કારણ માનવામાં આવી રહ્યું છે.
સ્ટડી અબ્રોડ કન્સલ્ટન્ટ્સનું કહેવું છે કે, ટ્રમ્પે પોતાના ચૂંટણી પ્રચારમાં પેટ્રોલિયમ, માઈનિંગ અને એગ્રીકલ્ચર જેવા સેક્ટર માટે જે વાતો કરી હતી, તેના પરથી એવું અનુમાન લગાવાઈ રહ્યું છે કે, ટ્રમ્પ સરકારમાં આ સેક્ટરો માટે નિયમોમાં છૂટાછાટ મળવાની આશા છે અને આ સેક્ટરોમાં નોકરીની વધુ તકો ઊભી થવાની શક્યતા છે, જેના કારણે આ સેક્ટરોને લગતા કોર્સમાં એડમિશન લેનારાની સંખ્યા વધી છે. ટ્રમ્પે પોતાની પહેલી ટર્મમાં પણ આ ઈન્ડસ્ટ્રીઝ માટે મહત્વપૂર્ણ પગલાં ભર્યા હતા, તેને જોતા બીજી ટર્મમાં પણ તેઓ આ ઈન્ડસ્ટ્રીઝને બૂસ્ટ કરવા માટે મહત્વપૂર્ણ ર્નિણયો લેશે તેવું માનવામાં આવી રહ્યું છે.
IDP એજ્યુકેશનના સાઉથ એશિયાના રિજનલ ડિરેક્ટર પિયુષ કુમારે અમારા સહયોગી અખબાર ધ ઈકોનોમિક ટાઈમ્સ સાથે વાત કરતા જણાવ્યું કે, પેટ્રોલિયમ અને માઈનિંગમાં નેચરલ ગેસ એન્જિનિયરિંગ, જીઓટેકનિકલ એન્જિનિયરિંગ અને મિનરલ એન્ડ એનર્જી ઈકોનોમિક્સ જેવા કોર્સની ડિમાન્ડમાં વધારો થયો છે. જ્યારે એગ્રીકલ્ચરમાં એનિમલ સાયન્સ, લાઈવસ્ટોક બિઝનેસ મેનેજમેન્ટ અને એગ્રોનોમી જેવા કોર્સનું આકર્ષણ વધ્યું છે. ટેક્સાસ અને કોલારાડો જેવા અનર્જી હબમાં આવેલી યુનિવર્સિટીઝ તેમજ એગ્રીકલ્ચર પાવરહાઉસ કહેવાતા મિડવેસ્ટની યુનિવર્સિટીઝ આ કોર્સીઝ કરવા માગતા વિદ્યાર્થીઓ માટે પરફેક્ટ છે.
કરિયર મોઝેકના જોઈન્ટ મેનેજિંગ ડિરેક્ટર મનિષા ઝવેરીએ જણાવ્યું હતું કે, પેટ્રોલિયમ, માઈનિંગ અને એગ્રીકલ્ચરનો કોર્સ લેનારામાંથી ૭૦થી ૮૦ ટકા વિદ્યાર્થીઓ પોસ્ટગ્રેજ્યુએટ્સ છે, જેમાંથી ઘણા જે-તે ફિલ્ડનો પહેલેથી જ અનુભવ ધરાવે છે. તેમના જણાવ્યા મુજબ, ફૂડ ટેકનોલોજી અને એગ્રીકલ્ચર સાયન્સ માટે એડમિશન લેનારા પોસ્ટગ્રેજ્યુએટ્સ અને અન્ડરગ્રેજ્યુએટ્સનો રેશિયોનો ૩:૧ છે. આ કોર્ષીઝ માટે વિદ્યાર્થીઓમાં ટેક્સાસ ડેવિસ જેવી યુનિવર્સિટીઓ રિજનલ ઈન્ડસ્ટ્રીઝ સાથેના તેમના મજબૂત ટાઈઅપના કારણે વધારે પોપ્યુલર છે.
જોકે, આ ટ્રન્ડ નવો નથી, પરંતુ તેમાં તાજેતરના વર્ષોમાં અચાનક ઉછાળો આવ્યો છે. ફોરેનએડમિટ્સના ફાઉન્ડર નિખિલ જૈને જણાવ્યું કે, કોરોના મહામારી પછી જ્યારે ગ્લોબલ સપ્લાય ચેઈન ખોરવાઈ ગઈ હતી તે પછી આ કોર્સીઝમાં એડમિશન લેનારા વધ્યા છે. વિદ્યાર્થીઓ આ ફિલ્ડ્સમાં સ્થિરતા અને ભવિષ્યમાં મળનારી તકોને જોઇ રહ્યા છે.
તેમણે જણાવ્યું કે, કોલારાડો સ્કૂલ ઓફ માઈન્સના સસ્ટેઈનેબલ રિસોર્સ એન્જિનિયરિંગ પ્રોગ્રામ જેવા પરંપરાગત જ્ઞાન સાથે સસ્ટેનેબલ પ્રેક્ટિસીઝનું કોમ્બિનેશન ધરાવતા પ્રોગ્રામો તરફ વિદ્યાર્થીઓનો ઝોક વધ્યો છે. આ ઉપરાંત આ ફિલ્ડ્સમાં મળતો પગાર પણ આકર્ષણનું એક મોટું કારણ છે. તેમણે જણાવ્યું કે, પેટ્રોલિયમ એન્જિનિયર્સને સરેરાશ ૧,૩૫,૬૦ ડોલરથી લઈને ૨,૨૫,૦૦ ડોલર સુધીની વાર્ષિક સેલેરી મળે છે.જ્યારે એગ્રીકલ્ચર એન્જિનિયરને સરેરાશ વાર્ષિક ૮૮,૭૫૦ ડોલરની સેલેરીવાળી જોબમાં નિયમિત ગ્રોથની તક દેખાઈ રહી છે. આ ઈન્ડસ્ટ્રીઝમાં એન્વાયર્મેન્ટ કોમ્પ્લાયન્સ ઓફિસર્સ અને રિન્યુએબલ એનર્જી એડવાઈઝર જેવી નવી જગ્યાઓ પણ ઊભી થઈ હોવાનું કન્સલ્ટન્ટ્સે જણાવ્યું હતું.
ટ્રમ્પ એડમિનિસ્ટ્રેશને એ સ્પષ્ટ કર્યું છે કે, તે એનર્જી મામલે કોઈના પર આધારિત રહેવા નથી માગતું. તેના માટે ઓઈલ અને નેચરલ ગેસ પ્રોડક્શન વધારાવાનું તેમજ રિન્યુએબલ એનર્જી પરનો આધાર ઘટાડાવા પર તેનો થોડા સમય માટે તો ફોકસ રહેશે જ. લીવરેજ એજ્યુના ફાઉન્ડર અક્ષય ચતુર્વેદીના કહેવા મુજબ, ટ્ર્મ્પ એડમિનિસ્ટ્રેશનની આ વાતનો અર્થ થયો છે કે, આ સેક્ટરોમાં નિયમોમાં છૂટછાટ મળશે, ગ્રેજ્યુએટ્સ માટે નોકરીની ઘણી તકો ઊભી થશે અને કેટલાક મર્જર એન્ડ એક્વાઝિશન પણ જોવા મળી શકે છે.
અમેરિકાના ભૂતપૂર્વ પ્રમુખ જાે બાઈડને અમેરિકાના દરિયાકિનારાના ૬૨૫૦ લાખ એકર વિસ્તારમાં ઓઈલ અને ગેસ ડ્રિલિંગ પર સંપૂર્ણ પ્રતિબંધ મૂકી દીધો છે. પરંતુ ટ્રમ્પ સ્પષ્ટ ચૂક્યા છે કે, તેઓ સત્તા સંભાળ્યા પછી આ પ્રતિબંધ ઉઠાવી લેશે અને ફોસિલ ફ્લ્યુઅલ ઈન્ડસ્ટ્રીઝને લાભ કરાવતી નીતિઓ પર પાછી લાગુ કરશે.
ઉલ્લેખનીય છે કે, અત્યાર સુધી એવું જાેવા મળ્યું છે કે, મોટાભાગના ભારતીય વિદ્યાર્થીઓ તો એટલા માટે જ અમેરિકા અભ્યાસ કરવા જતા હોય છે કે, ત્યાં નોકરી કરવા મળે અને સારી એવી કમાણી કરવા મળે. મોટાભાગે વિદ્યાર્થીઓ ક્લાસરૂમમાં ઓછા હાજર રહેતા હોય છે અને નોકરી કરવા પર વધારે ફોકસ રાખતા હોય છે. અત્યાર સુધી આવા વિદ્યાર્થીઓને કોઈ વાંધો આવતો ન હતો. પરંતુ ડોનાલ્ડ ટ્રમ્પની સરકારમાં આવા વિદ્યાર્થીઓ માટે મોટી તકલીફ ઊભી થઈ શકે છે.
અમેરિકનોની નોકરી ખાઈ જતા ઈમિગ્રેન્ટ્સને વીણી-વીણીને અમેરિકાની બહાર કરી દેવામાં આવશે તેવું કહી ચૂકેલા ટ્રમ્પ અભ્યાસની સાથે નોકરી કરતા વિદ્યાર્થીઓ પર પણ લગામ લગાવશે તે વાત સ્પષ્ટ છે. પરંતુ જે વિદ્યાર્થીઓ માત્ર અભ્યાસના ઉદ્દેશ્યથી અમેરિકા જાય છે, તેમને કોઈ વાંધો આવવાનો નથી.
