Last Updated on by Sampurna Samachar
મસ્કની નિમણૂકને ગેરબંધારણીય ગણાવીને તેને કોર્ટમાં પડકારવામાં આવી
(સંપૂર્ણ સમાચાર સેવા)
અમેરિકાના પ્રેસિડન્ટ ડોનાલ્ડ ટ્રમ્પને અબજોપતિ એલન મસ્ક સાથેની મિત્રતા ભારે પડે તેમ જણાઇ રહ્યુ છે. ૧૪ રાજ્યોએ ફેડરલ કોર્ટમાં એક કેસ દાખલ કરીને ડિપાર્ટમેન્ટ ઓફ ગવર્નમેન્ટ એફિશિયન્સી (DOGE) ના વડા તરીકે મસ્કની નિમણૂકને ગેરબંધારણીય ગણાવીને તેને પડકારી છે.
કોર્ટમાં કેસ દાખલ કરનારામાં ટ્રમ્પની રિપબ્લિકન પાર્ટીના બે ગવર્નરનો પણ સમાવેશ થાય છે. ટ્રમ્પે કાર્યક્ષમતામાં વધારો કરવા અને સરકારી કર્મચારીઓ અને વિભાગોમાં કાપ મૂકવા માટે આ નવા ડિપાર્ટમેન્ટની રચના કરેલી છે.
ન્યૂ મેક્સિકોની આગેવાની હેઠળના રાજ્યોએ આરોપ મૂક્યો છે કે એલન મસ્ક અરાજકતાના એજન્ટ છે. DOGE ના વડા તરીકે મસ્કને અમર્યાદ સત્તાથી અપાયેલી છે અને આ સત્તા અમેરિકાના બંધારણનું ઉલ્લંઘન કરે છે. વોશિંગ્ટન, ડી.સી.ની ફેડરલ કોર્ટમાં દાખલ કરાયેલ કેસમાં જણાવાયું છે કે સરકારી કર્મચારીઓની મોટા પાયે છટણી કરવાની અને સમગ્ર વિભાગોને ખતમ કરવાની મસ્કને અમર્યાદિત અને નિરંકુશ સત્તા અપાઈ છે, જે દેશની આઝાદી માટે લડત ચલાવનારા લોકો માટે આઘાતજનક છે.
બિનચૂંટાયેલા વ્યક્તિના હાથમાં તમામ સત્તાઓના કેન્દ્રીયકરણથી લોકશાહી માટે મોટો ખતરો ઊભા થાય છે. મસ્કની નિમણૂકને પડકારનારા રાજ્યોમાં ન્યુ મેક્સિકો ઉપરાંત એરિઝોના, કેલિફોર્નિયા, કનેક્ટિકટ, હવાઈ, મેરીલેન્ડ, મેસેચ્યુસેટ્સ, મિશિગન, મિનેસોટા, નેવાડા, ઓરેગોન, રહોડ આઇલેન્ડ, વર્માન્ટ અને વોશિંગ્ટનનો સમાવેશ થાય છે.
ઉલ્લેખનીય છે કે નેવાડા અને વર્મોન્ટમાં ટ્રમ્પની પાર્ટીના ગવર્નરો છે. DOGE ના વડા તરીકેની મસ્કની નિમણુકને પડકારતો આ બીજો કાનૂની દાવો છે. મેરીલેન્ડની ફેડરલ કોર્ટમાં દાખલ કરાયેલ એક અલગ કેસમાં પણ બંધારણની જોગવાઈનો ભંગ થતો હોવાની દલીલ કરાઈ છે.
૧૪ રાજ્યોએ દાખલ કરેલા કેસમાં જણાવ્યું છે કે બંધારણ મુજબ અમેરિકાના પ્રેસિડન્ટ ડોનાલ્ડ ટ્રમ્પ એક્ઝિક્યુટિવ બ્રાન્ચ અને ફેડરલ ખર્ચના માળખાને લગતા હાલના કાયદાઓની ઉપરવટ જઈ શકે નહીં. તેથી કમાન્ડર-ઇન-ચીફ તરીકે ટ્રમ્પ નવી ફેડરલ એજન્સીની રચના કે નાબૂદી કરી શકે નહીં.
મસ્કને વ્હાઇટ હાઉસના માત્ર એક સલાહકારની જગ્યાએ વિશેષ સત્તા ધરાવતા વ્યક્તિ ગણાવીને રાજ્યોએ કોર્ટમાં માગણી કરી છે કે મસ્કે અત્યાર સુધી આ વિભાગના વડા તરીકે જે પગલાં લીધા હોય તેને ગેરકાયદે જાહેર કરાય છે.
રૂપ્રેસિડન્ટ ડોનાલ્ડ ટ્રમ્પે નેશનલ એનર્જી ડોમિનેન્સ કાઉન્સિલની રચના કરવાના એક્ઝિક્યુટિવ ઓર્ડર પર હસ્તાક્ષર કર્યા હતાં. આ કાઉન્સિલને અમેરિકામાં ક્રૂડ ઓઇલ અને ગેસ ઉત્પાદનમાં ઝડપથી વધારો કરવાનો ટ્રમ્પે આદેશ છે. ટ્રમ્પના વહીવટીતંત્રે લ્યુઇસિયાનાના લિક્વિફાઇડ નેચરલ ગેસ પ્રોજેક્ટમાંથી નિકાસ કરવાની પણ શરતી મંજૂરી આપી હતી. એક વર્ષ પહેલા પૂર્વ પ્રેસિડન્ટ બાઇડને એલએનજીની નિકાસ પર પ્રતિબંધ મૂક્યો હતો.
