જાણીતી બ્રાન્ડ લાપિનોઝના પિઝામાંથી જીવતી ઈયળ નીકળી

Last Updated on 31/12/2025 by Sampurna Samachar

ગ્રાહકે ગંદકી અને બેદરકારીનો વીડિયો સોશિયલ મીડિયા પર વાયરલ કર્યો

લેબોરેટરી રિપોર્ટ આવ્યા બાદ આઉટલેટ વિરુદ્ધ કડક કાર્યવાહી થશે

(સંપૂર્ણ સમાચાર સેવા)
દાહોદ શહેરની જાણીતી પિઝા બ્રાન્ડ ‘લાપિનોઝ’ માં જમવા ગયેલા એક ગ્રાહકને ચોંકાવનારો અને અસહ્ય અનુભવ થયો હતો. ખાવા માટે મંગાવેલા પિઝાના એક ટુકડા પર જીવતી ઈયળ દેખાતાં ગ્રાહક સ્તબ્ધ થઈ ગયો હતો.

ગ્રાહકે આ ગંદકી અને બેદરકારીનો વીડિયો પોતાના મોબાઈલમાં કેદ કરી સોશિયલ મીડિયા પર વાયરલ કર્યો હતો. વીડિયોમાં પિઝાના ટોપિંગ્સ વચ્ચે ઈયળ ફરતી સ્પષ્ટ દેખાતી હતી, જેના કારણે પિઝાના શોખીનોમાં ભારે રોષ અને ફફડાટ ફેલાયો છે. બ્રાન્ડના નામે ઉંચી કિંમત વસૂલતા આઉટલેટ્સ દ્વારા રાખવામાં આવતી આવી અસ્વચ્છતા સામે અનેક સવાલો ઉભા થયા છે.

દાહોદ નગરપાલિકાનું આરોગ્ય તંત્ર એક્શનમાં આવ્યું

આ વીડિયો સોશિયલ મીડિયા પર વાયુવેગે વાયરલ થતાં દાહોદ નગરપાલિકાનું આરોગ્ય તંત્ર તાત્કાલિક એક્શનમાં આવ્યું હતું. પાલિકાની ફૂડ સેફ્ટી ટીમે લાપિનોઝ પિઝાના આઉટલેટ પર તપાસ હાથ ધરી હતી અને સ્થળ પરથી પિઝાના લોટ તેમજ અન્ય સામગ્રીના નમૂના લીધા હતા.

પાલિકાના અધિકારીઓએ જણાવ્યું હતું કે લેબોરેટરી રિપોર્ટ આવ્યા બાદ આઉટલેટ વિરુદ્ધ કડક કાયદેસરની કાર્યવાહી કરવામાં આવશે. ગ્રાહકોના સ્વાસ્થ્ય સાથે ચેડાં કરનાર કોઈ પણ એકમ સામે લાલ આંખ કરવામાં આવશે તેવી ખાતરી તંત્ર દ્વારા આપવામાં આવી છે.