શુભેંદુ અધિકારીએ એક રેલી યોજી હતી અને આરોપ લગાવ્યો
(સંપૂર્ણ સમાચાર સેવા)
પશ્ચિમ બંગાળમાં વિપક્ષના નેતા અને BJP ના વરિષ્ઠ નેતા શુભેંદુ અધિકારી સંદેશખલી પહોંચ્યા હતા. શુભેંદુ અધિકારીએ કહ્યું કે, તેઓ ક્યારેય મુસ્લિમોનો સાથ નહીં આપે કારણ કે મુસ્લિમો તેમને મત નથી આપતા. રાજ્યમાં એક કરોડથી વધુ રોહિંગ્યા છે. તેમને અહીંથી દૂર કરવા જોઈએ. જ્યારે પણ ભાજપ અહીં સત્તામાં આવશે, જે રીતે UP ના CM યોગી ત્યાં કરી રહ્યા છે, તે જ અહીં પણ થશે.
મહત્ત્વપૂર્ણ છે કે, શુભેંદુ અધિકારીએ એક રેલી યોજી હતી અને આરોપ લગાવ્યો હતો કે TMC સરકારે તેની પાર્ટીના નેતાઓના કથિત ગેરવર્તણૂકનો વિરોધ કરી રહેલી મહિલાઓ પર ખોટા આરોપો લગાવ્યા છે. જાહેર સભાને સંબોધતા, વિધાનસભામાં વિરોધ પક્ષના નેતા અધિકારીએ બેનરજીને “તોફાની ઇરાદાઓ” ધરાવતા વ્યક્તિ તરીકે ગણાવ્યા. તેમણે વચન આપ્યું કે, જો ૨૦૨૬ની વિધાનસભા ચૂંટણીમાં ભાજપ સત્તામાં આવશે તો સ્થાનિક તૃણમૂલ નેતાઓ દ્વારા કથિત અત્યાચારની તપાસ માટે એક કમિશનની રચના કરવામાં આવશે.
શુભેંદુ અધિકારીએ કહ્યું કે, મમતા બેનરજીએ ૨૦૨૪ની લોકસભા ચૂંટણી પહેલા સંદેશખલીમાં માતાઓ અને બહેનોની ધરપકડ કરવાનું કાવતરું ઘડ્યું હતું. તૃણમૂલના શાહજહાં શેખ જેવા સ્થાનિક મજબૂત નેતાઓ દ્વારા કરવામાં આવેલા દુષ્કૃત્યો સામે અવાજ ઉઠાવવા બદલ તેમની (માતાઓ અને બહેનો) વિરુદ્ધ ખોટા આરોપો લગાવવામાં આવ્યા હતા અને તેમની ધરપકડ કરવામાં આવી હતી.
જો ભાજપ સત્તામાં આવશે તો તમારે (મમતા બેનર્જી) આવા જુલમને પ્રોત્સાહન આપવા બદલ કાર્યવાહીનો સામનો કરવો પડશે. ઉલ્લેખનીય છે કે, ૨૦૨૪ની શરૂઆતમાં, સંદેશખલીમાં સ્થાનિક TMC નેતાઓ દ્વારા કથિત જમીન પચાવી પાડવા અને મહિલાઓની જાતીય સતામણી અંગે ભારે વિરોધ પ્રદર્શન થયા હતા.
