એક યુવકે ઇન્સ્ટાગ્રામની રીલ જોઇને શેરબજારમાં રોકાણ કરી ૧.૪૪ કરોડ ગુમાવ્યા
(સંપૂર્ણ સમાચાર સેવા)
સોશિયલ મીડિયા પરથી રોકાણની ટીપ્સ મેળવનાર લોકો છેતરપિંડી કરતી ગેંગનો ભોગ બની રહ્યા છે. રોકાણ પર અનેકગણું વળતર મેળવવા કે શોર્ટકટથી નાણાં કમાવવા જતા લોકો લાખો કરોડો રૂપિયા ગુમાવી રહ્યા હોવાના અનેક કિસ્સા સામે આવ્યા છે. ત્યારે પાલડી વિસ્તારમાં રહેતા યુવક સાથે આ જ પ્રકારની છેતરપિંડી થઇ હોવાનો કિસ્સો પ્રકાશમાં આવ્યો છે. એક યુવકે ઇન્સ્ટાગ્રામ પર શેરબજારમાં રોકાણની માહિતી આપતી રીલ જોઇ હતી. જેમાં રોકાણ પણ અનેક ગણો નફો આપવાની ખાતરી આપતા તેણે લાલચમાં આવીને ત્રણ મહિનામાં ૧.૪૪ કરોડનું રોકાણ કર્યું હતું. રોકાણ માટેની મોબાઇલ એપ્લિકેશનમાં યુવકને ૪૦ કરોડનો નફો થયો હોવાનું દર્શાવ્યું હતું. યુવકને તેની મૂડી કે નફો ન મળતા આખરે તેણે પાલડી પોલીસ સ્ટેશનમાં આ મામલે ફરિયાદ આપતા પોલીસે તપાસ હાથ ધરી છે.
શહેરના પાલડી વિશ્વકુંજ ચાર રસ્તા પાસે આવેલા મીના એપાર્ટમેન્ટમાં રહેતા નીલ શાહ એક કંપનીમાં એક્ઝિક્યુટિવ મેનેજર છે. ગત એપ્રિલ માસમાં ઇન્સ્ટાગ્રામમાં આવેલી રીલમાં શેરબજારમાં રોકાણ કરવાની સામે ઊંચા વળતરની લાલચ અપાઇ હતી. જેથી નીલભાઇએ રોકાણ કરવા માટે ક્લીક કરતા તેમને ૧૩૦ સભ્યો ધરાવતા એક વોટ્સએપ ગ્રૂપમાં એડ કરવામાં આવ્યા હતા. જેમાં રોકાણ પર પાંચથી વીસ ટકા નફો આપવાની ખાતરી આપવામાં આવી હતી.
એટલું જ નહીં આ ગ્રૂપમાં રોકાણ કરીને નફો મેળવ્યો હોવાના સ્ક્રીન શોટ પણ મુકાયા હતા. જેથી નીલ શાહને વિશ્વાસ આવતા તેમણે શેરબજારમાં રોકાણ કરવા માટે રસ દાખવીને એઇમ ટોપ નામની મોબાઇલ એપ્લિકેશન ડાઉનલોડ કરી હતી. જેમાં પ્રથમ પાંચ લાખનું રોકાણ કર્યું હતું. ત્યારબાદ તબક્કા વાર ત્રણ મહિનામાં ૧.૪૪ કરોડ રૂપિયાનું રોકાણ કર્યું હતું. જેની સામે મોબાઇલ એપ્લિકેશનમાં ૪૦ કરોડનો નફો બતાવવામાં આવ્યો હતો. નીલભાઇએ નફામાંથી નાણાં ઉપાડવા પ્રોસેસ કરી ત્યારે નાણાં એકાઉન્ટમાં ટ્રાન્સફર થયા નહોતા. જેથી તેમણે ગ્રૂપ એડમિન સહિતના લોકોને સંપર્ક કરતા તેમને કોઇ જવાબ મળ્યો નહોતો. જેથી તપાસ કરતા તેમની સાથે છેતરપિંડી થયાની જાણ થતાં તેમણે પાલડી પોલીસ સ્ટેશનમાં આ મામલે ફરિયાદ નોંધાવી છે.
