ડેનમાર્કને ૧.૩ બિલિયન ડોલરનો ચૂનો લગાવતા કોર્ટે ફટકારી સજા
(સંપૂર્ણ સમાચાર સેવા)
બ્રિટિશ હેજ ફંડ ટ્રેડર સંજય શાહને ડેનમાર્કની એક કોર્ટે ૧૨ વર્ષની જેલની સજા ફટકારી છે. સંજય શાહને કમ-એક્સ ટેક્સ કેસમાં દોષિત ઠેરવવામાં આવ્યો છે અને તેના માટે તેને આ સજા ફટકારવામાં આવી છે. આ ટેક્સ ફ્રોડ દ્વારા સંજય શાહે ડેનમાર્કને ૧.૩ બિલિયન ડોલરનો ચૂનો લગાવ્યો હતો. આ સજા ડેનિશ ઈતિહાસમાં ટેક્સ ફ્રોડ માટે સૌથી લાંબી સજા પૈકીની એક છે. ૨૦૦૮ની નાણાકીય કટોકટી પછી ઘણા યુરોપીયન દેશોની જાહેર તિજોરીને અબજો ડોલરનો ચૂનો લગાવનારી આ ટ્રેડિંગ સ્કીમ્સને લઈને હાઈ-પ્રોફાઈલ ટ્રાયલ ચાલી હતી.
ઘણા દેશોને અબજો ડોલરનો ચૂનો લગાવનારી આ ટ્રેડિંગ સ્કીમનો માસ્ટરમાઈન્ડ ભારતીય મૂળનો સંજય શાહ છે અને તેથી જ કોર્ટે તેને દોષિત ઠરેવ્યો છે. ૫૪ વર્ષીય સંજય શાહે ૨૦૧૨ અને ૨૦૧૫ દરમિયાન ડેનિશ ટ્રેઝરીમાંથી ડિવિડન્ટ ટેક્સ રિફન્ડમાં નવ બિલિયન ડેનિશ ક્રાઉન એટલે કે અંદાજીત ૧.૨૭ બિલિયન ડોલરની છેતરપિંડી કરી હતી. જોકે, સંજય શાહે પોતાના પર લાગેલા આરોપોને ફગાવી દીધા હતા. સંજય શાહે પોતે કંઈ પણ ખોટું કર્યું હોવાની વાતને નકારી કાઢી હતી. એટલું જ નહીં તેણે દલીલ કરી હતી કે તેણે ફક્ત લીગલ લૂપહોલનો જ ઉપયોગ કર્યો હતો. ડેનિશ કોર્ટે ચૂકાદો આપ્યો તેના તુરંત બાદ તેણે ડેનિશ હાઈકોર્ટમાં અપીલ કરી હતી. પ્રોસિક્યુટર્સે સંજય શાહને ૧૨ વર્ષની જેલની સજા ફટકારવાનું કહ્યું હતું.
ચૂકાદા પહેલા ડેનિશ બ્રોડકાસ્ટર સાથેના ઈન્ટરવ્યુમાં સંજય શાહે પોતાને લોભી ગણાવ્યો હતો અને કહ્યું હતું કે, તેની ટ્રેડિંગ સ્કીમ સ્પેસ ઈન્વેડર્સ ગેમ રમવા જેવી હતી જ્યાં તે પોતાનો જ અગાઉનો હાઈસ્કોર તોડવા ઈચ્છતો હતો. કોપનહેગન બિઝનેસ સ્કૂલના એસોસિયેટ પ્રોફેસર ફ્લોરિયન હોલેનબાકે જણાવ્યું હતું કે, આ આકરી સજા છે. આ ચુકાદો વિશ્વભરની ટેક્સ ઓથોરિટીઝ અને પ્રોસિક્યુટર્સને સંકેત આપે છે કે કરચોરીને સહેજ પણ ચલાવી લેવી જોઈએ નહીં. સંજય શાહને લંડનમાં એક અલગ ૧.૪૪ બિલિયન પાઉન્ડ ( અંદાજીત ૧.૮૩ બિલિયન ડોલર)ના સિવિલ ટેક્સ ફ્રોડ કેસનો પણ સામનો કરવો પડી રહ્યો છે, જે ડેનિશ ટેક્સ ઓથોરિટી દ્વારા દાખલ કરવામાં આવ્યો છે. આ કેસ એપ્રિલમાં સમાપ્ત થવાનો છે.
તેણે ડેનમાર્કથી વિડીયો-લિંક દ્વારા લંડનની હાઈકોર્ટને જણાવ્યું છે કે કાયદામાં રહેલી “ખામી”નો લાભ ઉઠાવીને તેણે ટ્રેડિંગ સ્ટ્રેટેજી બનાવી હતી અને તે એટલી સફળ રહી હતી કે તેનાથી તેણે એક ફેરારી ખરીદી હતી અને જ્યારે તે ૪૦ વર્ષનો થયો ત્યારે તેણે પોતાને ૧૯ મિલિયન પાઉન્ડનું બોનસ ચૂકવ્યું હતું. સંજય શાહની ૨૦૨૨માં દુબઈમાં ધરપકડ કરવામાં આવી હતી અને કાર્યવાહી માટે તે પછીના વર્ષે ડેનમાર્ક પ્રત્યાર્પણ કરવામાં આવ્યું હતું.
સંજય શાહના લંડન સ્થિત હેજ ફંડ સોલો કેપિટલ પાર્ટનર્સના નિર્દેશથી રોકાણકારોએ ડિવિડન્ડ ચૂકવણીના દિવસની આસપાસ ઝડપથી શેર્સનું ટ્રેડિંગ કર્યું હતું. પ્રોસિક્યુટરના જણાવ્યા પ્રમાણે પ્રત્યેક ડિવિડન્ડ પર ટેક્સ રિફન્ડ માટે એલિજિબલ બની શકાય છે અને સંજય શાહે આ બાબતનો લાભ ઉઠાવ્યો હતો. ડેનિશ ન્યાય પ્રધાન પીટર હમ્મેલગાર્ડે રોઇટર્સને એક ઇમેઇલમાં જણાવ્યું હતું કે તેઓ પરિણામથી સંતુષ્ટ છે. ડેનિશ જસ્ટિસ મિનિસ્ટર પીટર હમ્મેલગાર્ડે જણાવ્યું હતું કે, સંજય શાહને જે સજા થઈ છે તેનાથી તેઓ સંતુષ્ટ છે. સંજય શાહે કોર્ટમાં કહ્યું હતું કે ટ્રેડ્સે પાર્ટિસિપન્ટ્સને શેર્સની માલિકીનો દાવો કરવાની મંજૂરી આપી હતી. આમ તેઓ શેર્સની માલિકી ધરાવતા ન હોય અને ડેનમાર્કમાં ક્યારેય કોઈ ડિવિડન્ડ ટેક્સ ચૂકવ્યો ન હોય તો પણ તેઓ ટેક્સ રિફંડ માટે હકદાર છે. આ રીતે સંજય શાહે ડેનમાર્કને અબજો ડોલરનો ચૂનો લગાવ્યો હતો અને હવે તેને જેલ જવાનો વારો આવ્યો છે.
