CM યોગીના વિધાનસભામાં વિપક્ષ પર ઉગ્ર શાબ્દિક પ્રહારો
(સંપૂર્ણ સમાચાર સેવા)
મુખ્યમંત્રી યોગી આદિત્યનાથે ઉત્તર પ્રદેશ વિધાનસભાના શિયાળુ સત્ર દરમિયાન વિપક્ષ પર શાબ્દિક હુમલો કર્યો, ૧૬ ડિસેમ્બરે, મુખ્યમંત્રીએ બહરાઇચ અને સંભલના મુદ્દા પર સમાજવાદી પાર્ટી અને અન્ય વિપક્ષી પાર્ટીઓને ઘેરી લીધા. આ દરમિયાન મુખ્યમંત્રીએ જય શ્રી રામ અને અલ્લાહ હુ અકબરના નારા બોલી પોતાની વાત રાખી.
મુખ્યમંત્રીએ કહ્યું કે અલ્લાહ હુ અકબર બોલ્યા પછી જો કોઈ હિંદુ કહે કે મને ગમતું નથી તો શું તમને ગમશે ? મુખ્યમંત્રીએ કહ્યું કે જો કોઈ જય શ્રી રામ બોલે તો શા માટે ચિડાઈ જાય, આ ચીડાવવાની વાત નથી. અહીં પશ્ચિમમાં રામ-રામ કહેવાની પરંપરા છે. જ્યારે આપણે મળીએ ત્યારે રામ રામ કહીએ છીએ, છેલ્લી યાત્રામાં પણ રામનામ સત્ય છે. જો કોઈ જયશ્રી રામ કહે તો તે ચીડવવાનું કાર્ય નથી. CM એ કહ્યું કે મારે બીજા કોઈ સ્લોગનની જરૂર નથી.
CM એ કહ્યું કે રામ રામ શબ્દ ક્યાંથી સાંપ્રદાયિક બન્યો? બાબા સાહેબના મૂળ બંધારણમાં રામ હનુમાન જ છે, બાબર ઔરંગઝેબની પરંપરા આ દેશમાં ચાલુ નહીં રહે. અહીં રામ કૃષ્ણ અને બુદ્ધની પરંપરા યથાવત રહેશે. પોતાના સંબોધન દરમિયાન રમખાણોનો ઉલ્લેખ કરતા મુખ્યમંત્રી યોગી આદિત્યનાથે કહ્યું કે જ્યારે મુસ્લિમ સમુદાયના તહેવારોની સરઘસ હિંદુ વિસ્તારોમાંથી સુરક્ષિત રીતે પસાર થાય છે ત્યારે તેમને કોઈ સમસ્યાનો સામનો કરવો પડતો નથી. મુસ્લિમ સમાજનું સરઘસ પણ મંદિરની સામેથી પસાર થાય છે પરંતુ કોઈ સમસ્યા નથી.
અગાઉ, CM એ કહ્યું હતું કે NCRB ના ડેટા અનુસાર, ૨૦૧૭ થી રાજ્યમાં કોમી રમખાણોમાં ૯૭ થી ૯૯ ટકાનો ઘટાડો થયો છે. યુપીમાં ૨૦૧૭ થી કોઈ રમખાણો થયા નથી, જ્યારે ૨૦૧૨ થી ૨૦૧૭ દરમિયાન રાજ્યમાં ૮૧૫ કોમી રમખાણો થયા હતા અને ૧૯૨ લોકોના મોત થયા હતા. ૨૦૦૭ થી ૨૦૧૧ વચ્ચે ૬૧૬ સાંપ્રદાયિક ઘટનાઓ બની હતી, જેમાં ૧૨૧ લોકોના મોત થયા હતા. સીએમ યોગીએ કહ્યું કે આપણે ક્યાં સુધી તથ્યો છુપાવીને જનતાને ગુમરાહ કરીશું. CM એ કહ્યું કે કોર્ટના આદેશ પર સંભલમાં સર્વે કરવામાં આવી રહ્યો છે. સૂર્ય, ચંદ્ર અને સત્યને કોઈ લાંબા સમય સુધી છુપાવી શકતું નથી, સત્ય જલ્દી બહાર આવશે.
