જો તમે ખેડૂતના પુત્ર છો તો હું મજૂરોનો પુત્ર છું ખડગેનો પલટવાર
(સંપૂર્ણ સમાચાર સેવા)
રાજ્યસભાના અધ્યક્ષ જગદીપ ધનખડ વિરુદ્ધ અવિશ્વાસ પ્રસ્તાવની નોટિસને લઈને ગૃહમાં ભારે હોબાળો થયો હતો. ગૃહના અધ્યક્ષ ધનખડ અને રાજ્યસભામાં વિપક્ષના નેતા મલ્લિકાર્જુન ખડગે વચ્ચે ઉગ્ર બોલાચાલી થઈ હતી. જગદીપ ધનખડે કહ્યું કે, હું એક ખેડૂતનો દીકરો છું. હું કોઈની સામે ઝૂકતો નથી. મેં ઘણું સહન કર્યું. મેં દરેકને માન આપ્યું. જેનો જવાબ આપતા રાજ્યસભામાં વિપક્ષના નેતા મલ્લિકાર્જન ખડગેએ કહ્યું કે, તમે બંધારણનો ભંગ કર્યો છે. અમે અહીં તમારી પ્રશંસા કરવા નથી આવ્યા. તમે નિયમો અનુસાર ગૃહ ચલાવો. ખડગેએ ધનખડને કહ્યું કે, જો તમે ખેડૂતના પુત્ર છો તો હું મજૂરોનો પુત્ર છું.
તમે અમારું અપમાન કર્યું છે તો અમે તમારું સન્માન કેવી રીતે કરીશું.” રાજ્યસભાના અધ્યક્ષ જગદીપ ધનખડ અને કોંગ્રેસના વરિષ્ઠ સાંસદ મલ્લિકાર્જુન ખડગે વચ્ચે ઉગ્ર દલીલબાજી બાદ ગૃહમાં હંગામો શરૂ થયો હતો. આ પછી રાજ્યસભાની કાર્યવાહી સ્થગિત કરી દેવામાં આવી હતી. બીજી તરફ આમ આદમી પાર્ટીના સાંસદ સંજય સિંહે કહ્યું કે, ભાજપ હવે ખેડૂતોની વાત કરે છે. જે પક્ષના હાથ ૭૫૦ ખેડૂતોના લોહીથી રંગાયેલા છે. તે પાર્ટી ખેડૂતોના હિતની વાત કરી રહી છે. ગૃહમાં વિપક્ષ અને સરકાર વચ્ચે આક્ષેપ-પ્રતિઆક્ષેપોનો દોર જારી રહ્યો હતો. રાજ્યસભામાં સતત હોબાળાને કારણે અધ્યક્ષ ધનખડે ગૃહની કાર્યવાહી સ્થગિત કરી દીધી હતી. આ પહેલા ગુરુવારે પણ હંગામાને કારણે ગૃહની કાર્યવાહી સ્થગિત કરવામાં આવી હતી.
