RBI ની ઓફીશીયલ વેબસાઈટ પર ધમકીભર્યો ઈ-મેલ મળ્યો
(સંપૂર્ણ સમાચાર સેવા)
રિઝર્વ બેંક ઓફ ઈન્ડિયાને બોમ્બની ધમકી મળી છે. RBI ની સત્તાવાર વેબસાઈટ પર આ ધમકીભર્યો ઈ-મેલ મળ્યો હતો. ઈ-મેલમાં રશિયન ભાષામાં રિઝર્વ બેંકને બોમ્બથી ઉડાવી દેવાની ધમકી હતી. આ મામલે માતા રમાબાઈ માર્ગ પોલીસ સ્ટેશનમાં અજાણ્યા આરોપીઓ વિરુદ્ધ કેસ નોંધવામાં આવ્યો છે. ઘટનાની ગંભીરતાને ધ્યાનમાં લઈને પોલીસે તપાસ શરૂ કરી છે.
મહત્ત્વપૂર્ણ છે કે, આ પહેલીવાર નથી જ્યારે RBI ને બોમ્બથી ઉડાવી દેવાની ધમકી આપવામાં આવી હોય. ગયા મહિનાની શરૂઆતમાં, રિઝર્વ બેંક ઓફ ઈન્ડિયાના કસ્ટમ કેર નંબર પર ફોન કરીને RBI ને ઉડાવી દેવાની ધમકી આપવામાં આવી હતી. ફોન કરનારે પોતાને લશ્કર-એ-તૈયબાના તરીકે ઓળખાવ્યો હતો.
છેલ્લા કેટલાક દિવસોમાં આવી ઘણી ધમકીઓ મળી છે. ક્યારેક એરપોર્ટને તો ક્યારેક સ્કૂલોને બોમ્બથી ઉડાવી દેવાના ધમકીભર્યા કોલ મળી રહ્યા છે. તપાસ દરમિયાન આમાંથી મોટાભાગના કોલ નકલી હોવાનું જાણવા મળે છે.
રાજધાની દિલ્હીની શાળાઓને બોમ્બની ધમકીનો મેલ મળ્યો હતો, જેના પછી વિવિધ એજન્સીઓએ શાળાના પરિસરમાં સર્ચ કરવાનું શરૂ કર્યું હતું. અગાઉ ૯ ડિસેમ્બરે દિલ્હીની ઓછામાં ઓછી ૪૪ શાળાઓને સમાન ઈમેલ મળ્યા હતા. સંપૂર્ણ તપાસ બાદ પોલીસે આ ધમકીઓને અફવા ગણાવી હતી.
