હરમીતને ભારત વિરોધી અને ખાલિસ્તાની સમર્થક કહી લોકોએ ટીપ્પણી કરી
(સંપૂર્ણ સમાચાર સેવા)
અમેરિકાના પ્રેસિડેન્ટ તરીકે ચૂંટાયેલા ડોનાલ્ડ ટ્રમ્પ હાલમાં મહત્વના હોદ્દાઓ પર તેમના વિશ્વાસુ વ્યક્તિઓનું નિમણૂક કરી રહ્યા છે. ટ્રમ્પે હવે US જસ્ટિસ ડિપાર્ટમેન્ટના સિવિલ રાઈટ્સ ડિવિઝનના વડા તરીકે ભારતીય મૂળના હરમીત કૌર ધિલ્લોનની પસંદગી કરી છે. હરમીત કૌર ધિલ્લોન કેલિફોર્નિયાના લૉયર છે અને તે રિપબ્લિક પાર્ટીના વિશ્વાસુ છે. જોકે, કેટલાક ભારતીય ટીકાકારોનું કહેવું છે કે હરમીત ખાલિસ્તાનીઓ પ્રત્યે કૂણું વલણ અપનાવે છે. જસ્ટિસ ડિપાર્ટમેન્ટમાં હરમીત એજી પામ બોન્ડીને રિપોર્ટિંગ કરનારા ફોર્થ-રેન્કિંગ અધિકારી હશે. ઓબામા પ્રેસિડેન્સી દરમિયાન સિવિલ રાઈટ્સ ડિપાર્ટમેન્ટની આગેવાની કરનારા વનિતા ગુપ્તા બાદ આ પદ સંભાળનારા તે બીજા ઈન્ડિયન-અમેરિકન પણ છે.
હરમીત ફ્રીડમ ઓફ સ્પીચ માટે લડતી આવી છે. ફ્રી સ્પીચ સેન્સરશિપ માટે પોતાનો અવાજ ઉઠાવતી વખતે તેણે ટેક કંપનીઓ સામે લાંબી લડાઈ લડી છે. હરમીતને પોતાની આસિસ્ટન્ટ એટર્ની જનરલ તરીકે નોમિનેટ કરતાં ટ્રમ્પે સોશિયલ મીડિયા પોસ્ટમાં લખ્યું હતું કે, તેઓ હરમીત કૌર ધિલ્લોનને US ડિપાર્ટમેન્ટ ઓફ જસ્ટિસમાં સિવિલ રાઈટ્સ માટે આસિસ્ટન્ટ એટર્ની જનરલ તરીકે નોમિનેટ કરીને ખુશ છે. સમગ્ર કારકિર્દી દરમિયાન હરમીતે નાગરિક સ્વતંત્રતાના બચાવમાં સતત અવાજ ઉઠાવ્યો છે. ચૂંટણીની પારદર્શિતા હોય કે બંધારણ અને નાગરિક અધિકારોનું રક્ષણ હોય, તે હંમેશા અગ્રેસર રહી છે. તે શીખ સમુદાયી રિસ્પેક્ટેડ મેમ્બર છે અને આશા છે કે તે અમેરિકાના નાગરિકોના બંધારણીય અધિકારોનું રક્ષણ કરશે.
હરમીત કૌર ધિલ્લોનનો જન્મ ચંદીગઢમાં થયો હતો પરંતુ જ્યારે તે બે વર્ષની હતી ત્યારે તેના ડોક્ટર પિતા અમેરિકા આવી ગયા હતા. શરૂઆતના વર્ષો ન્યૂયોર્કના બ્રોન્ક્સમાં વિતાવ્યા બાદ હરમીતનો પરિવાર નોર્થ કેરોલાઈના શિફ્ટ થઈ ગયો હતો અને ત્યાં તેઓ રેજિસ્ટર્ડ રિપબ્લિકન્સ બન્યા હતા. હરમીતે ડાર્ટમાઉથ કોલેજમાંથી ક્લાસિકલ લિટરેચરમાં સ્નાતકની ડિગ્રી મેળવ્યા બાદ તેમણે લૉની ડિગ્રી મેળવવા માટે વર્જિનિયા યુનિવર્સિટીમાં એડમિશન લીધું હતું. કારકિર્દીની શરૂઆતમાં હરમીતે ફોર્થ સર્કિટ માટે યુએસ કોર્ટ ઓફ અપીલ્સના જસ્ટિસ પૌલ વી. નિમેયર માટે અને જસ્ટિસ ડિપાર્ટમેન્ટના સિવિલ ડિવિઝનમાં ક્લર્કનું કામ કર્યું હતું.
જોકે, ભારતમાં હરમીતના નોમિનેશનથી સવાલો ઉઠ્યા છે અને લોકોએ તેમના જૂના ટિ્વટ્સ શેર કરવાનું શરૂ કર્યું, જેમાં તે ખાલિસ્તાનનું સમર્થન કરતી જોવા મળી રહી છે. એક્સપર્ટ બ્રહ્મા ચેલ્લાનીએ સોશિયલ મીડિયા પ્લેટફોર્મ એક્સ પર લખ્યું હતું કે, હરમીત ધિલ્લોનની નિમણૂકની જાહેરાતથી ભારત ખુશ ન હોઈ શકે. કારણ કે ભારત પર આક્ષેપો કરીને તેણે ખાલિસ્તાન ઉગ્રવાદ પ્રત્યે સહાનુભૂતિ વ્યક્ત કરી છે. તેમણે હરમીત ધિલ્લોન દ્વારા કરવામાં આવેલી એક જૂની ટિ્વટ પણ શેર કરી હતી જેમાં તેમણે ખાલિસ્તાનનું સમર્થન કર્યું હતું.
હરમીતનો જન્મ પંજાબના ખેડૂત પરિવારમાં થયો હતો અને તેથી જ તેમણે ભારતમાં ખેડૂત આંદોલનનું સમર્થન કર્યું હતું. તેમણે સોશિયલ મીડિયા પર લખ્યું હતું કે, પંજાબમાં ખેડૂત પરિવારમાં જન્મેલી હોવાથી સરકાર દ્વારા બનાવવામાં આવેલા ખેડૂત વિરોધી કાયદાઓનો વિરોધ કરી રહેલા ખેડૂતો પર જે હુમલા થઈ રહ્યા છે તે જોઈને તે ઘણી દુઃખી છે.
ભારત સરકારના કાયદા ખેડૂતોના ખેતરો, તેમની જીવનશૈલી અને તેમની સંસ્કૃતિને ખતમ કરી દેશે. તેમણે વડાપ્રધાન નરેન્દ્ર મોદીને અપીલ કરી હતી કે તેઓ ખેડૂતોને મળે અને સમાધાન કરે. ખાલિસ્તાની આતંકી હરદીપ સિંહ નિજ્જરની હત્યા બાદ કેનેડાના વડા પ્રધાન જસ્ટિન ટ્રૂડોએ ભારત સામે જે આક્ષેપો કર્યા હતા તેવી જ વાત હરમીત ધિલ્લોને પણ કરી હતી. હરમીતે “નોર્થ અમેરિકામાં શીખ એક્ટિવિસ્ટ્સને ટાર્ગેટ બનાવતી ઈન્ડિયન ડેથ સ્ક્વોડ્સ”નો ઉલ્લેખ કરીને વિવાદ ઊભો કર્યો હતો.
બીજી તરફ હરમીત કૌર ધિલ્લોને સોશિયલ મીડિયા પર પોતાની ખુશી વ્યક્ત કરતા કહ્યું હતું કે, ટ્રમ્પે સિવિલ રાઈટ્સના વડા તરીકે તેમની પસંદગી કરી તે માટે તે ગર્વ અનુભવી રહ્યા છે. આ સાથે તેમણે પોતાના પરિવારને પણ યાદ કર્યો હતો અને કહ્યું હતું કે, તેમની માતા અને ભાઈના સહકાર વગર તે અહીં સુધી પહોંચી શકી ન હોત. જોકે, હરમીત કૌર ધિલ્લોનના પતિ સર્વજીત સિંહ રંધાવાનું આ વર્ષે ઓગસ્ટમાં નિધન થયું હતું. સર્વજીત સિંહ પણ રિપબ્લિકન પાર્ટીના કાર્યકર્તા હતા અને કેન્સર તથા પાર્કિન્સનના કારણે તેમનું નિધન થયું હતું.
