રાજકોટની ૩, જૂનાગઢની બે અને અમદાવાદ – ભાવનગર એક પેઢી સામે ફરિયાદ
(સંપૂર્ણ સમાચાર સેવા)
રાજકોટમાં ૬૧.૩૮ લાખની GST ચોરી મામલે ક્રાઇમ બ્રાન્ચમાં મહેશ લાંગા હસ્તકની ૧૪ જેટલી પેઢીઓ સામે ફરિયાદ નોંધાઈ હતી. એ પછી ફરી સાત બોગસ પેઢીઓએ સાથે મળીને રૂપિયા ૭૯.૨૦ લાખની GSTની ચોરી કરી અને કૌભાંડ સામે આવતા ક્રાઇમ બ્રાન્ચમાં વધુ એક ગુનો નોંધવામાં આવ્યો છે. જેમાં રાજકોટમાં ત્રણ, જૂનાગઢમાં બે અને અમદાવાદ તથા ભાવનગરમાં એક-એક પેઢી હોવાનું સામે આવ્યું છે. આ સાતમાંથી બે પેઢી એવી છે જેના ઉપર ચાર દિવસમાં આ બીજો GST ચોરીનો ગુનો દાખલ થયો છે.
મળતી માહિતી મુજબ રાજકોટ ડી.સી.બી. પોલીસ સ્ટેશનમાં સેન્ટ્રલ GST કચેરી રાજકોટના સુપ્રિટેન્ડેન્ટ જયપ્રકાશસિંહ રામચંદ્રસિહએ ૭૯.૨૦ લાખ રૂપિયાની GST ચોરી અંગે ફરિયાદ નોંધાવી છે. જેમાં રાજકોટ ગોંડલ રોડ ઉપરમાં આશિષ કોમ્પ્લેક્ષમાં આવેલી શ્રી ક્રિષ્ના ટ્રેડીંગ પેઢી, રાજકોટ નંદી પાર્ક દર્શિત કોમ્પ્લેક્ષમાં આવેલી યેશ ડેવલોપર પેઢી, રાજકોટ સાધુ વાસવાણી રોડ પર ડેકોરા ઉત્સવમાં આવેલી આર કે એન્ટરપ્રાઈઝ, જૂનાગઢ ઝાંઝરડા ચોકડી પાસે ગાર્ડન આઇકોનમાં આવેલી બી જે ઓડેદરા પેઢી, જૂનાગઢના ટીંબાવાડી ગામે મોટી પેલેસમાં આવેલી ક્રીઝલ એન્ટરપ્રાઈઝ, ભાવનગર વાઘાવાડી રોડ પર શુરભી કોમ્પ્લેક્ષમાં આવેલી ઓન કન્સ્ટ્રકશન અને અમદાવાદ નંદવિહાર રેસીડેન્સીમાં આવેલ ડી એ એન્ટરપ્રાઈઝનો સમાવેશ થાય છે.
ફરીયાદમાં જણાવવા મુજબ, અજાણી વ્યક્તિ દ્વારા શ્રી ક્રિષ્ના ટ્રેડીંગ નામે પેઢી બનાવી ખોટો ભાડા કરાર કરી ખરા તરીકે રાજકોટ CGST ભવન રેસકોર્સ ઓફિસ સહિત ઓનલાઈન રજુ કરી ફેબ્રુઆરી ૨૦૨૩થી માર્ચ ૨૦૨૩ દરમિયાન બોગસ ઈનપુટ ટેક્સ મેળવવા માટે અન્ય છ પેઢીઓના સંચાલકો સાથે મળી કાવતરૂ રચી બનાવટી બિલિંગ, બોગસ દસ્તાવેજો અને ખોટી રજુઆતો દ્વારા ઈનપુટ ટેક્સ ક્રેડિટ મેળવવા સરકારને ૭૯.૨૦ લાખનું નુકશાન કર્યું હતું. આ પેઢીઓએ માત્ર એક જ મહિનામાં ૨૦૧ જેટલા વ્યવહારો કર્યા હોવાનું સામે આવ્યું છે. હાલ આ મામલે પોલીસે ગુનો નોંધી વધુ તપાસ હાથ ધરી છે
