ધારી ગ્રામપંચાયતને રાજ્ય સરકારે આપ્યો નગર પાલિકાનો દરજ્જો
સમગ્ર વિસ્તારના વિકાસને વેગ મળશે
(સંપૂર્ણ સમાચાર સેવા)
અમરેલી જિલ્લામાં આવેલા ધારીના લોકો માટે સારા સમાચાર છે. ધારીને રાજ્ય સરકાર દ્વારા નગર પાલિકાનો દરજ્જો આપવામાં આવ્યો છે. મુખ્યમંત્રી ભૂપેન્દ્ર પટેલે મહત્વનો ર્નિણય લેતા ધારી ગ્રામ પંચાયલને નગરપાલિકાનો દરજ્જો આપવાના ર્નિણયને મંજૂરી આપી છે. આ નગર પાલિકા સાથે રાજ્યમાં કુલ નગરપાલિકાની સંખ્યા ૧૬૦ થઈ જશે.
ધારી ગ્રામ પંચાયતમાં ધારીની આસપાસના પ્રેમપરા, હરિપરા, વેકરીયાપરા, નવાપરા-લાઈનપરા જૂથ ગ્રામપંચાયત ભેળવી દઈને આ ધારી નગરપાલિકાની રચના કરવામાં આવશે. અમરેલી જિલ્લાનું ધારી આંબરડી સફારી પાર્ક તથા પ્રાચીન ગળધરા ખોડીયાર માતા મંદિરથી ૬ કિલોમીટરના અંતરે વસેલું છે.એટલું જ નહિં, ધારીમાં ગીર પૂર્વ અભયારણ્ય અને જંગલ વિસ્તાર આવેલા હોઈ મોટી સંખ્યામાં વર્ષ દરમ્યાન પ્રવાસીઓ આવતા રહે છે.
આ આંબરડી સફારી પાર્ક અને ગીર પૂર્વ અભયારણ્ય વિસ્તારમાં આવનારા પ્રવાસીઓને વધુ સુવિધાઓ મળી રહે તેમજ સ્થાનિક રોજગારી સાથે આર્થિક-સામાજિક જીવનમાં પણ ઉન્નતિ થાય તેવા પ્રવાસન વિકાસના ધ્યેય સાથે ધારીને નગરપાલિકાનો દરજ્જાે આપવાનો મુખ્યમંત્રીએ ર્નિણય કર્યો છે. એટલું જ નહિં, ધારી તાલુકાના ૨૫ જેટલા ગામો જંગલ વિસ્તારના હોવાથી ક્યારેક જંગલની આગના બનાવો બને તેવા સમયે ફાયર ફાઈટર અને અગ્નિશમન સેવાઓ પણ આ નગરપાલિકા દ્વારા સરળતાએ સમયસર મળે તેવો આશય પણ નગરપાલિકાની રચનામાં રહેલો છે.
ધારીને નગરપાલિકાનો દરજ્જો મળતા આ વિસ્તારનો સર્વગ્રાહી વિકાસ થશે અને પ્રવાસનને વેગ મળશે તેમજ નગરપાલિકાની નાગરિક લક્ષી સુવિધા મળવાથી લોકોના ઈઝ ઓફ લિવિંગમાં પણ વૃદ્ધિ થશે. આ ધારી નગરપાલિકા રાજ્યની ૧૬૦મી નગરપાલિકા બનશે. અત્યારે ‘અ’ વર્ગની ૨૨, ‘બ’ વર્ગની ૩૦, ‘ક’ વર્ગની ૬૦ અને ‘ડ’ વર્ગની ૪૨ મળી કુલ ૧૫૯ નગરપાલિકાઓ કાર્યરત છે. હવે તેમાં આ નવી ‘ડ’ વર્ગની નગરપાલિકા ધારી નગરપાલિકાનો ઉમેરો થશે.
મુખ્યમંત્રી ભૂપેન્દ્ર પટેલે આ ઉપરાંત અન્ય એક ર્નિણય લઈને સાબરકાંઠાની ઈડર નગરપાલિકામાં જવાનપુરા-સદાતપુરા ગામ અને સોસાયટી વિસ્તારનો પણ સમાવેશ કરવાની દરખાસ્તને અનુમતિ આપી છે. ઈડરની જનતા જનાર્દનની લાંબા સમયની માંગણીનો મુખ્યમંત્રીશ્રીએ સકારાત્મક પ્રતિસાદ આપીને આ બે ગ્રામપંચાયતોનો ઈડર નગરપાલિકામાં મર્જ કરવા ર્નિણય કર્યો છે.
આના પરિણામે ઈડર શહેરનો વિસ્તાર વ્યાપ હવે વધવાથી ટી.પી. સ્કીમ કે ડેવલોપમેન્ટ પ્લાન સરળતાએ થઈ શકશે તેમજ સમગ્ર વિસ્તારના વિકાસને વેગ મળશે.
