દીલ્હી હાઇકોર્ટે આપ સરકારની ઇમાનદારી પર શંકા વ્યક્ત કરી

CAG  રિપોર્ટને લઈને દિલ્હી સરકાર પર સવાલ ઊભા કર્યાં

(સંપૂર્ણ સમાચાર સેવા)

દિલ્હીમાં વિધાનસભા ચૂંટણીની વચ્ચે હાઈકોર્ટે આમ આદમી પાર્ટી સરકાર પર મહત્ત્વની ટિપ્પણી કરી છે. કોમ્પ્ટ્રોલર અને ઓડિટર જનરલના ૧૪ રિપોર્ટ વિધાનસભામાં રજૂ ન કરવાને લઈને હાઈકોર્ટે સરકારની ઈમાનદારી પર શંકા વ્યક્ત કરી છે. કોર્ટે આ ટિપ્પણી એવા સમયે કરી છે જ્યારે મીડિયામાં CAG ના બે રિપોર્ટ લીક થઈ ગયા છે. જેમાં સીએમના બંગલા પર ખોટી રીતે કરોડો રૂપિયાનો ખર્ચ અને એક્સાઈઝ પોલિસીથી સરકારી ખજાનાને ૨૦૦૦ કરોડ રૂપિયાથી વધુ નુકસાનનો દાવો કરવામાં આવ્યો છે.

જસ્ટિસ સચિન દત્તાની બેન્ચે સીએજી રિપોર્ટને લઈને દિલ્હી સરકાર પર સવાલ ઊભા કર્યાં. હાઈકોર્ટે સીએજી રિપોર્ટ પર વિચાર કરવામાં મોડાઈ માટે દિલ્હી સરકારની ટીકા કરતાં કહ્યું, ‘જે રીતે તમે પીછેહઠ કરી છે, તેનાથી તમારી ઈમાનદારી પર શંકા ઊભી થાય છે. તમારે રિપોર્ટને તાત્કાલિક સ્પીકરને મોકલવો જાેઈતો હતો અને ગૃહમાં ચર્ચા શરૂ કરવાની હતી. ટાઈમલાઈન એકદમ સ્પષ્ટ છે. તમે વિધાનસભા સત્ર બોલાવવામાં પીછેહઠ કરી. એલજીની પાસે રિપોર્ટ મોકલવા અને આ મુદ્દે મોડાઈથી તમારી ઈમાનદારી પર શંકા થાય છે. દિલ્હી સરકારે રિપોર્ટ્‌સને સ્પીકરની પાસે મોકલવામાં સક્રિયતા બતાવવી જાેઈતી હતી. જવાબમાં દિલ્હી સરકારે સવાલ કર્યો કે ‘ચૂંટણીની નજીક વિધાનસભા સત્ર કેવી રીતે હોઈ શકે.’

ગત સુનાવણી પર દિલ્હી વિધાનસભાના સચિવાલયે કોર્ટને જણાવ્યું હતું કે ‘સીએજી રિપોર્ટને વિધાનસભામાં રજૂ કરવાથી હેતું પૂરો થતો નથી કેમ કે કાર્યકાળ ફેબ્રુઆરીમાં પૂરો થઈ રહ્યો છે. આ પહેલા દિલ્હી હાઈકોર્ટે દિલ્હી સરકાર, સ્પીકર અને અન્ય સંબંધિત પક્ષોથી જવાબ માગ્યો હતો. તમામ ૧૪ રિપોર્ટ્‌સને સ્પીકરની પાસે મોકલી ચૂકાયા છે.

ભાજપ ધારાસભ્યોએ સીએજી રિપોર્ટ વિધાનસભામાં રજૂ કરવાની માગને લઈને હાઈકોર્ટનો દરવાજો ખખડાવ્યો હતો. ભાજપ લાંબા સમયથી માંગ કરી રહી છે કે સીએજી રિપોર્ટને વિધાનસભામાં રજૂ કરવામાં આવશે. ભાજપનું કહેવું છે કે એક ડઝનથી વધુ સીએજી રિપોર્ટ વિધાનસભામાં વર્ષોથી પેન્ડિંગ છે.