Last Updated on by Sampurna Samachar
બ્લડ બેંક સામે કાયદેસરની કાર્યવાહી
મધ્ય પ્રદેશની સરકારે પોઝિટિવ રિપોર્ટ આવતાં કડક પગલાં ભર્યા
(સંપૂર્ણ સમાચાર સેવા)
મધ્ય પ્રદેશના સતના જિલ્લાના સરદાર વલ્લભભાઈ પટેલ હોસ્પિટલમાં ૬ બાળકોના HIV પોઝિટિવ રિપોર્ટ સામે આવ્યા બાદ રાજ્ય સરકારે કડક પગલાં લીધા છે. પ્રાથમિક તપાસમાં બેદરકારી સામે આવતા હોસ્પિટલના બ્લડ બેન્કના પ્રભારી ડૉક્ટર તેમજ બે લેબ ટેક્નિશિયનને ફરજ પરથી દૂર કરવામાં આવ્યા છે.
અહેવાલ અનુસાર, વરિષ્ઠ અધિકારીએ જણાવ્યું કે, રાજ્યના લોક સ્વાસ્થ્ય પરિવાર કલ્યાણ વિભાગે આ મામલે તપાસ માટે વિશેષ સમિતિની રચના કરી હતી. સમિતિની શરૂઆતી રિપોર્ટમાં બ્લડ ટ્રાન્સફ્યુઝન પ્રક્રિયામાં ગંભીર બેદરકારીના સંકેત મળ્યા બાદ આ પગલું ભરવામાં આવ્યું છે.જેમાં બ્લડ બેન્કના પ્રભારી ડૉ. દેવેન્દ્ર પટેલ અને લેબ ટેક્નિશિયન રામભાઈ ત્રિપાઠી તથા નંદલાલ પાંડેને તાત્કાલિક પ્રભાવથી સસ્પેન્ડ કરવામાં આવ્યા છે. આ સિવાય, જિલ્લા હોસ્પિટલના પૂર્વ સિવિલ સર્જન મનોજ શુક્લાને કારણ જણાવો નોટિસ જાહેર કરવામાં આવી છે અને તેમની પાસે લેખિતમાં સ્પષ્ટીકરણની માંગ કરવામાં આવી છે.
HIV પોઝીટીવ બ્લડ ચઢવાથી માસુમો બન્યા HIV નાં શિકાર
અધિકારીઓએ સ્પષ્ટ કર્યું કે, જો આ સિવિલ સર્જનનો જવાબ સંતોષકારક નહીં હોય, તો તેમની સામે પણ કડક વિભાગીય કાર્યવાહી કરવામાં આવશે. સરકારે આ મામલાને અત્યંત ગંભીર જણાવતા કહ્યું કે, બાળકોના સ્વાસ્થ્ય સાથે કોઈપણ પ્રકારની બેદરકારી ચલાવી લેવામાં નહીં આવે.
એવું કહેવાય છે કે, ૧૨ થી ૧૫ વર્ષની ઉંમરના છ બાળકો અલગ-અલગ સમયે જિલ્લા હોસ્પિટલમાં લોહી ચઢાવ્યા બાદ HIV પોઝિટિવ થયા હતા. આ કેસ જાન્યુઆરી થી મે મહિનાની વચ્ચે સામે આવ્યા છે. જેમાંથી અમુક બાળકોને સતના અને જબલપુર સહિત અન્ય જિલ્લાની સરકારી હોસ્પિટલમાં લોહી ચઢાવવામાં આવ્યું હતું.
આ કેસ સામે આવ્યા બાદ સ્વાસ્થ્ય વિભાગમાં ખળભળાટ મચી ગયો છે. તપાસમાં એ પણ સામે આવ્યું છે કે, એક બાળકના માતા-પિતા પણ HIV સંક્રમિત થયા છે. જોકે, અધિકારીએ સ્પષ્ટ કરી ચુક્યા છે કે, તમામ બાળકોની સારવાર રાષ્ટ્રીય HIV ઉપચાર પ્રોટોકોલ અનુસાર કરવામાં આવી રહ્યું છે.
સરકારે આશ્વાસન આપ્યું કે, તપાસ પૂરી થયા બાદ ગુનેગારો સામે કડક કાર્યવાહી કરવામાં આવશે અને ભવિષ્યમાં આ પ્રકારની ઘટનાઓને રોકવા માટે બ્લડ બેન્ક અને ટ્રાન્સફ્યુઝન સિસ્ટમની વ્યાપક સમીક્ષા કરવામાં આવશે.
