GST અધિકારી હોવાની ખોટી ઓળખ આપી પડાવતો હતો પૈસા
વડોદરા સાયબર ક્રાઇમે ઝડપી ભુજ ખાતે નોંધાયેલા ગુનાનો ભેદ ઉકેલ્યો
(સંપૂર્ણ સમાચાર સેવા)
વેપારીઓને ફોન કરી પોતે પોલીસ તેમજ GST અધિકારી હોવાની ખોટી ઓળખ આપી રૂપિયા પડાવતો તથા તાંદલજાના વેપારીને ખોટું કારણ દર્શાવી સાયબર ફ્રોડના રૂપિયા ટ્રાન્સફર કરવનાર ઝૂબેર મેમણને વડોદરા સાયબર ક્રાઇમે ઝડપી પાડી જે.પી રોડ પોલીસ સ્ટેશન અને ભુજ ખાતે નોંધાયેલા ગુનાનો ભેદ ઉકેલી કાઢ્યો છે.
પ્રાપ્ત માહિતી મુજબ શહેરના આજવો રોડ સ્થિત શબીનાપાર્કમાં રહેતો ઝુબેર ઇબ્રાહીમ મેમણ વેપારીઓને GST અધિકારી તેમજ પોલીસ હોવાની ખોટી ઓળખ આપી ફોન પર બિલ વગરનો માલ તેમજ ચોરીનો માલ લીધેલાનુ જણાવી આ અંગે કેસ કરવાની ધમકી આપી વેપારીઓને ડરાવી રૂપિયા પડાવી લેતો હોવાની બાતમી વડોદરા ક્રાઇમ બ્રાન્ચને મળી હતી. જેથી ક્રાઇમ બ્રાન્ચની ટીમ ઝુબેરની શોધમાં લાગી હતી.
આ દરમિયાન પોલીસને જાણકારી મળતા રાજપુરાની પોળમાંથી ઝુબેર ઇબ્રાહીમ મેમણને ઝડપી પાડ્યો હતો. ક્રાઇમ બ્રાન્ચની ટીમે ઝુબેરની પ્રાથમિક પુછતાછ કરતા તેણે ભુજ ખાતે એક ચોકસીને ફોન કરી પોતે અમદાવાદ ક્રાઇમ બ્રાન્ચમાંથી બોલતો હોવાનુ તેમજ ચોકસીએ ચોરીના સોના-ચાંદીના દાગીના ખરીદ્યા હોય તે ગુનામાં ધરપકડ કરવાની ધમકી આપી હતી. આ ઉપરાંત જો ધરપકડ ના કરવી હોય તો રૂપિયા આપવા પડશે તેમ જણાવી ચોકસી પાસેથી જુદા જુદા ઓનલાઇન ટ્રાન્જેક્શન થકી રૂ. ૮૧ હજાર પડાવી લીધા હતા. જેમાંનું એક ટ્રાન્જેક્શન તાંદલજાના એક વેપારીના બેન્ક ખાતામાં કરાવી તેમને ખોટુ કારણ દર્શાવી રોકડા મેળવી લીધા હતા.
જોકે આ રૂપિયા ક્યાંથી આવ્યાં છે તે બાબતે વેપારી તદ્દન અજાણ હતો. અને જ્યારે તે બેન્કમાં પહોંચ્યા ત્યારે વેપારીને જાણવા મળ્યું કે, તેમના ખાતામાં આવેલા રૂ. ૪૧ હજાર સાયબર ફ્રોડના હોવાથી એકાઉન્ટ ફ્રીઝ કરી દેવામાં આવ્યું છે.દીકરીને ઉમરા જવાનું હોવાથી રોકડા રૂપિયા જોઇતા હોવાનું જણાવી ભેજાબાજે બે વેપારીના બેન્ક એકાઉન્ટમાં સાયબર ફ્રોડના રૂપિયા ટ્રાન્સફર કરાવી લીધા હતા અને પોતે ૮૧ હજાર રોકડા લઇ લીધા હતા.તાંદલજા સનફાર્મા કંપનીની સામે રાબીયા પાર્કમાં રહેતાં મોહંમદસોહેલ આસિફઅલી સૈયદ તાંદલજા હીબા એવન્યુમાં સદફ કલેક્શન નામની કપડાની દુકાન ચલાવે છે. જે.પી.રોડ પોલીસ સ્ટેશનમાં તેણે ફરિયાદ નોધાવી જણાવ્યું છે કે, આ વ્યક્તિ અવાર – નવાર મારી દુકાન પર આવતો હોઇ તેના પર ભરોસો રાખી મેં મારા એકાઉન્ટનું સ્કેનર આપ્યું હતું.
તેણે મને કહ્યું કે, મારા ઓળખીતા તમારા એકાઉન્ટમાં ૪૧ હજાર ટ્રાન્સફર કરશે. સાંજે તમે મને રોકડા ૪૧ હજાર આપી દેજાે.રકમ આવતા મે તેને ચુકવી દીધા હતા. ત્રણ દિવસ પછી હું મારી દુકાનનો સામાન લેવા ગયો ત્યારે રૂપિયા ટ્રાન્સફર થયા નહતા. મેં બેકમાં જઇને તપાસ કરી તો જાણવા મળ્યું કે, મારા એકાઉન્ટમાં સાયબર ફ્રોડના રૂપિયા આવ્યા હોવાથી મારૂં એકાઉન્ટ ફ્રીઝ થઇ ગયું છે. આરોપીએ મારી પાસેથી ૪૦ હજાર તથા મારા મિત્ર શાહનવાઝ રમજાનભાઇ બંજારાના એકાઉન્ટમાં પણ સાયબર ફ્રેાડના રૂપિયા નંખાવી છેતરપિંડી કરી હતી.
