ભયાનક અકસ્માતનો વિડીઓ વાયરલ
(સંપૂર્ણ સમાચાર સેવા)
નશાની હાલતમાં વાહન હંકારી લોકોના જીવને જોખમમાં મુકવાના બનાવોમાં સતત વધારો થઈ રહ્યો છે. અમદાવાદ શહેરના બોપલ-આંબલી રોડ પર ઓડીના કારચાલકે નશાની હાલતમાં ૫થી ૭ વાહનોને અડફેટે લીધા હતા. ત્યારે આવી જ એક ઘટના મહારાષ્ટ્રમાં સામે આવી છે. અહીં એક દારૂડીયા ડ્રાઈવરે બેફામ SUV હંકારી પાંચ લોકોને અડફેટે લીધા હોવાનો વીડિયો સામે આવ્યો છે.
મળતા અહેવાલો મુજબ, આ ઘટના મહારાષ્ટ્રના અહિલ્યાનગર જિલ્લાના શ્રીગોંડા તાલુકામાં ભીડભાડ વાળા વિસ્તારમાં બની છે, જેમાં એક દારૂડીયા ડ્રાઈવરે પાંચ લોકો પર SUV ચઢાવ્યા બાદ એક ૨૯ વર્ષિય વ્યક્તિનું મોત નિપજ્યું છે. આરોપી ડ્રાઈવર કથિત રીતે દારુના નશામાં હોવાના અહેવાલો પણ સામે આવ્યા છે.
સોશિયલ મીડિયા પર કારે પાંચ લોકોને અડફેટે લીધા હોવાના CCTV ફુટેજ પણ વાયરલ થયા છે. વીડિયોમાં જોવા મળી રહ્યું છે કે, એક SUV બેફામ ગતીએ આવીને ચાર રસ્તાની બાજુએ ઉભેલા લોકોને કડતી રહી છે. ચાર રસ્તા પર ધસમસતી આવી રહેલી કાર પહેલા બાઈક ચાલકને અડફેટે લે છે, પછી ચાર રસ્તા પાસે ઉભેલા ચાર લોકોને અડફેટે લેતી જોવા મળી રહી છે. આ દરમિયાન અફરાતફરી જોવા મળી રહી છે અને આસપાસના લોકો તુરંત ગાડી તરફ દોડી જાય છે. આ ઘટનામાં પાંચથી છ લોકો ઈજાગ્રસ્ત થયા હોવાની વિગતો મળી છે, જ્યારે તેમાંથી એક વ્યક્તિને ડૉક્ટરોએ મૃત જાહેર કર્યો છે.
મળતા અહેવાલો મુજબ ઘટનાની જાણ થતાં જ પોલીસની ટીમ અને એમ્બ્યુલન્સની ટીમ તુરંત ઘટનાસ્થળે પહોંચી ગઈ હતી અને તમામ ઈજાગ્રસ્તોને નજીકના હોસ્પિટલમાં ખસેડ્યા હતા. પોલીસે કાર ડ્રાઈવરને કસ્ટડીમાં લીધો છે. ડ્રાઈવર નશામાં હતો કે નહીં, તેની તપાસ કરવા માટે તેના સેમ્પલો તપાસ માટે મોકલી દેવાયા છે.
