Last Updated on by Sampurna Samachar
ગૃહમંત્રીએ શેર કર્યો વીડિયો
ઉદ્ધવ ઠાકરેની બેગની તપાસને લઈને ચાલી રહેલા રાજકીય વિવાદ વચ્ચે આ ઘટના બની
(સંપૂર્ણ સમાચાર સેવા)
મહારાષ્ટ્રના હિંગોલીમાં ગૃહમંત્રી અમિત શાહની બેગની તપાસ કરવામાં આવી હતી. ચૂંટણી પંચના અધિકારીઓએ શાહની બેગ તપાસી હતી. ઉદ્ધવ ઠાકરેની બેગની તપાસને લઈને ચાલી રહેલા રાજકીય વિવાદ વચ્ચે આ ઘટના બની છે. યવતમાલ જિલ્લામાં અને લાતુરમાં ઉદ્ધવ ઠાકરેની બેગની બે વાર તપાસ કરવામાં આવી હતી.
અમિત શાહે પોતાના સોશિયલ મીડિયા હેન્ડલ પર બેગ ચેકિંગને લઈને આ માહિતી આપી છે અમિત શાહે લખ્યું કે, મહારાષ્ટ્રની હિંગોલી વિધાનસભામાં ચૂંટણી પ્રચાર દરમિયાન ચૂંટણી પંચના અધિકારીઓ દ્વારા મારા હેલિકોપ્ટરની તપાસ કરવામાં આવી હતી. ભાજપ નિષ્પક્ષ ચૂંટણી અને તંદુરસ્ત ચૂંટણી વ્યવસ્થામાં વિશ્વાસ રાખે છે અને માનનીય ચૂંટણી પંચ દ્વારા બનાવેલા તમામ નિયમોનું પાલન કરે છે. આપણે બધાએ તંદુરસ્ત ચૂંટણી પ્રણાલીમાં યોગદાન આપવું જોઈએ અને ભારતને વિશ્વની સૌથી મજબૂત લોકશાહી બનાવી રાખવા માટે આપણી ફરજો નિભાવવી જોઈએ.
અગાઉ એક દિવસ પહેલા મહારાષ્ટ્ર યુનિટે એક વીડિયો પોસ્ટ કર્યો હતો જેમાં સુરક્ષા કર્મચારીઓ ડેપ્યુટી CM દેવેન્દ્ર ફડણવીસની ‘બેગ’ તપાસતા જોવા મળે છે. ભાજપે કહ્યું કે માત્ર દેખાડો કરવા માટે બંધારણનો આશરો લેવો પૂરતો નથી અને દરેકે બંધારણીય પ્રણાલીનું પણ પાલન કરવું જોઈએ. ભાજપે પોસ્ટમાં કહ્યું હતું કે કેટલાક નેતાઓને ‘ડ્રામા’ કરવાની આદત છે. આ પોસ્ટને ભૂતપૂર્વ CM ઉદ્ધવ ઠાકરેની આગેવાનીવાળી પાર્ટી શિવસેના દ્વારા છેલ્લા બે દિવસમાં ઓનલાઈન વીડિયો શેર કર્યા બાદ શેર કરવામાં આવી હતી.
ઉદ્ધવ ઠાકરેએ દાવો કર્યો હતો કે ૨૦ નવેમ્બરે યોજાનારી રાજ્ય વિધાનસભા ચૂંટણીના પ્રચાર માટે લાતુર અને યવતમાલ જિલ્લામાં પહોંચ્યા બાદ ચૂંટણી અધિકારીઓએ તેમની બેગ તપાસી હતી. ઠાકરેએ એમ પણ પૂછ્યું હતું કે શું આ જ નિયમ વડાપ્રધાન નરેન્દ્ર મોદી અને સત્તાધારી ગઠબંધનના અન્ય વરિષ્ઠ નેતાઓને તેમના ચૂંટણી પ્રચાર દરમિયાન લાગુ કરવામાં આવશે.
