ડીસાના ઝેરડા ગામે પિકઅપ ડાલામાંથી ૩.૦૪ લાખનો દારૂ ઝડપ્યો
(સંપૂર્ણ સમાચાર સેવા)
બનાસકાંઠા LCB પોલીસે ડીસા તાલુકાના ઝેરડા ગામેથી રૂ. ૩.૦૪ લાખના વિદેશી દારૂ ભરેલા પિકઅપ ડાલાને ઝડપી પાડ્યું હતું. પોલીસે રૂ.૭,૧૯,૩૭૫નો મુદ્દામાલ કબજે કરી બે જણાની અટકાયત કરવામાં આવી છે.
પ્રાપ્ત માહિતી અનુસાર બનાસકાંઠા LCB પોલીસ સ્ટાફના માણસો ડીસા પંથકમાં પેટ્રોલિંગમાં હતા તે સમય દરમિયાન બાતમી આધારે ડીસા તાલુકાના ઝેરડા ગામે રોડ ઉપર પિકઅપ ડાલુ શંકાસ્પદ લાગતાં તેનું ચેકિંગ કરતાં તેમાંથી વિદેશી દારૂ તેમજ બિયરની પેટીઓ મળી કુલ ૧૦૪૩ બોટલ કિં. રૂ. ૩,૦૪,૩૭૫નો જથ્થો મળી આવ્યો હતો. આથી પોલીસે બે મોબાઈલ, પિકઅપ ડાલુ કિં. રૂ. ૪ લાખ મળી કુલ રૂ. ૭,૧૯,૩૭૫ના મુદ્દામાલ સાથે ચાલક ગૌતમ સાંગારામજી માળી (સોલંકી) (રહે. બાડમેર બળદેવનગર) તેમજ ક્લીનર શ્રવણનાથ કાળુનાથ ગૌસ્વામી (રહે. ગુંદાવ તા.જિ. સાંચોર રાજસ્થાન)ને ઝડપી લઇ દારૂનો જથ્થો મંગાવનાર તમામ વિરુદ્ધ ડીસા તાલુકા પોલીસ સ્ટેશનને ગુનો નોંધી કાર્યવાહી હાથ ધરવામાં આવી છે.
