નવી પદ્ધતિમાં રેશનિંગ દુકાનદારોને થોડી મુશ્કેલી
(સંપૂર્ણ સમાચાર સેવા)
પુરવઠા વિભાગ દ્વારા ૧૪ નવેમ્બરથી ભૂતિયા રેશનિંગ દુકાન સંચાલકોને નાથવા ઈ-પ્રોફાઇલ બાદ જ વિતરણ વ્યવસ્થા થઇ શકે તેવી નવી પદ્ધતિનો અમલ શરૂ કરી દેતા રાજ્યની કેટલીક દુકાનના સંચાલકો ઇ-પ્રોફાઇલની તમામ વિગતો તૈયાર ન કરી શકતા તેઓ લોગ ઇન કરી નહીં શકતા હોવાની સમસ્યા સર્જાઇ છે. તેના કારણે ગ્રાહકોને અનાજ વિતરણ કરી શકાતું નહીં હોવાથી સંચાલકોને થોડો સમય આપવા માંગણી કરાઇ છે.
પુરવઠા વિભાગની નવી પદ્ધતિના કારણે ભૂતિયા સંચાલકો પર અંકુશ આવી શકતો હોવાથી તેને આવકારવામાં આવી છે. જો કે દુકાનદાર નેશનલ બેન્કનું એકાઉન્ટ અને આધાર કાર્ડ સાથેનું પાન કાર્ડ અપડેટ કરાવીને ઇ-પ્રોફાઇલ સબમિટ કરાવે તો જ તેના લોગ ઇન અને થમ્બથી સિસ્ટમ કાર્યરત થઇ શકે છે. તે સાથે જો કોઇ રેશનિંગની દુકાન સહકારી મંડળી થકી સંચાલિત હોય તો દુકાનદાર સંચાલકના નહીં પણ સહકારી મંડળીના ચેરમેન કે સેક્રેટરીના નામનું આધાર કાર્ડ અને પાન કાર્ડ આપીને સહકારી મંડળીના નામનું પાન કાર્ડ બનાવીને તેને ઇ-પ્રોફાઇલમાં અપડેટ કરાવાનું અનિવાર્ય છે. તે પછી જ લોગ ઇન કરીને વિતરણ વ્યવસ્થા ચાલુ કરી શકાય તેમ છે. આ પદ્ધતિઓમાં જે દુકાનદાર સંચાલકો બાકી રહી ગયા છે તેમને નવા પાન કાર્ડ બનાવવા સમય આપવામાં આવે તેવી માગણી દુકાનદારો દ્વારા કરવામાં આવી છે. જેથી તે ઇ-પ્રોફાઇલ અપડેટ કરાવી શકે અને રેશનિંગની દુકાનમાં આવતા ગ્રાહકોને અનાજનું વિતરણ વ્યવસ્થા યથાવત રાખી શકે. જે સંચાલકનું ઇ-પ્રોફાઇલ અપડેટ ના થયું હોય તેમનો ખુલાસો માગીને વિતરણ વ્યવસ્થા અટકે નહીં તેવો ઉપાય કરવા માગણી છે.
