અનેક લાગતા વળગતાઓ નારાજ થવાની શક્યતા
કાંકરિયા કાર્નિવલ ૨૫મી ડિસેમ્બરે પ્રારંભ થશે
(સંપૂર્ણ સમાચાર સેવા)
દિવાળીનાં તહેવારોમાં શોપીંગ ફેસ્ટિવલની શરૂઆત બાદ હવે શહેરમાં મ્યુનિ. દ્વારા આયોજિત ઉત્સવોની મોસમ આવી રહી છે. આગામી દિવસોમાં બુક ફેસ્ટિવલ, કાંકરિયા કાર્નિવલ, ફ્લાવર શો અને ફૂડ ફેસ્ટિવલનાં આયોજનની તૈયારીઓનો ધમધમાટ શરૂ થયો છે, પરંતુ તેમાં આ વર્ષથી કાંકરિયા કાર્નિવલનાં આયોજનની જવાબદારી ખાનગી એજન્સીને હવાલે કરવાની હિલચાલ ચાલી રહી છે, તેનાથી અનેક લાગતાવળગતાઓ નારાજ થવાની શક્યતા વધી જવા પામી છે.
મ્યુનિ. સૂત્રોમાંથી પ્રાપ્ત વિગતો અનુસાર, તત્કાલીન મુખ્યમંત્રી અને વર્તમાન વડાપ્રધાન નરેન્દ્રભાઇ મોદીએ ઐતિહાસિક કાંકરિયા તળાવનું ડેવલપમેન્ટ કરાવીને શહેરીજનો માટે કાંકરિયા કાર્નિવલનો શુભારંભ કરાવ્યો હતો. જેમાં કાંકરિયા લેકળન્ટમાં ત્રણ ચાર જગ્યાએ સ્ટેજ બનાવી ભારત જોડો કાર્યક્રમ, સાંસ્કૃતિક અને મનોરંજનના કાર્યક્રમો, મલ્ટીમીડિયા શો, લેસર શો સહિત વિવિધ પ્રકારની એક્ટિવિટીનું આયોજન મ્યુનિ.નાં અધિકારીઓ દ્વારા જ કરવામાં આવતું હતું.
કાંકરિયા કાર્નિવલમાં પરફોમન્સ કરવાની તક મળે અને સાથે કમાણી પણ થાય તેવા હેતુથી અનેક સંસ્થાઓ, ગ્રૂપ અને વ્યક્તિઓ તેમનાં ઓળખીતા રાજકારણીઓની મદદ લેતાં હતા. શાસક ભાજપનાં અગાઉનાં અમુક હોદ્દેદારોએ પણ અનેક મિત્રો અને ભલામણોવાળાઓને તક આપી છે. એટલું જ નહિ, ડે.કમિશનરો તથા કાંકરિયા કાર્નિવલનાં આયોજન સાથે સંકળાયેલાં અધિકારીઓએ પણ પોતાનાં ઓળખીતાઓને તક આપવાની સાથે કમાણી કરવાની તક છોડી નથી તેવી ચર્ચા વર્ષોથી ચાલી આવે છે.
દરમિયાનમાં વર્તમાન મ્યુનિ.કમિશનરે કાંકરિયા કાર્નિવલના આયોજનમાં ધરખમ ફેરફારો કરતાં કાર્નિવલનું આયોજન ખાનગી એજન્સીને સોંપવાનો ર્નિણય લીધો છે અને એજન્સીઓ દ્વારા પ્રેઝન્ટેશન પણ કરી દેવાયા હોવાનું જાણવા મળ્યું છે. આ અંગે અધિકારીઓનું કહેવું છે કે, કાર્નિવલનાં આયોજનમાં ખાનગી એજન્સીને સઘળી જવાબદારી સોંપી દેવાથી કંઇક તો નવીનતા જોવા મળશે અને પ્રોફેશનલ ટચનાં કારણે કાર્નિવલ કંઇક અલગ પ્રકારે જ માણવા મળશે.
મ્યુનિ. સૂત્રોએ ક્હ્યું કે, કાંકરિયા કાર્નિવલ ૨૫મી ડિસેમ્બરે પ્રારંભ થશે તે પહેલાં મ્યુનિ. અને નેશનલ બુક ટ્રસ્ટનાં ઉપક્રમે ૩૦મી નવેમ્બરથી સાબરમતી રિવરફ્રન્ટ ખાતે અમદાવાદ ઇન્ટરનેશનલ બુક ફેસ્ટિવલ-૨૦૨૪ યોજવામાં આવશે. અગાઉ બુક ફેર રિવરફ્રન્ટ માં યોજવાની શરૂઆત થઈ હતી, ત્યારબાદ જુદી જુદી જગ્યાઓએ બુક ફેર યોજવાનાં પ્રયોગો પણ થઇ ચૂક્યા છે. જોકે, હવે રિવરફ્રન્ટ ઉપર યોજાનારા બુક ફેર માટે આસિ.કમિશનર તેજસ ભંડારીને જવાબદારી સોંપીને તેમનાં હાથ નીચે અન્ય અધિકારીઓને અલગ અલગ કામગીરી સોંપવામાં આવી છે.
આ સિવાય જાન્યુઆરીનાં પ્રથમ સપ્તાહમાં રિવરફ્રન્ટ ખાતે ઇવેન્ટ સેન્ટર તેમજ ફ્લાવર ગાર્ડન ખાતે ફ્લાવર શોનું આયોજન કરવામાં આવનાર છે. બીજી બાજુ મ્યુનિ. બગીચા ખાતાનાં ડાયરેક્ટર જીજ્ઞેશ પટેલે રાજીનામું આપી દીધું હોવાથી તેમની જગ્યાએ આસી.ડાયરેકટર અને જુદા જુદા ખાતાનાં અધિકારીઓને ફ્લાવર શોને સફફ્ર બનાવવાની જવાબદારી સોંપવામાં આવી છે. ફ્લાવર શોમાં ન્યૂસન્સ ના થાય તે માટે એન્ટ્રી ફી લેવામાં આવશે અને તેના દર હવે નક્કી કરાશે.રિવરફ્રન્ટ ઉપર ગત વર્ષની જેમ ફૂડ ફેસ્ટિવલ યોજવાની પણ તૈયારી ચાલી રહી છે.
